Aizawl district-ah hmun dang
ami vawk leh vawksa lak khap
Mizoram district thenkhat – Lunglei, Siaha, Lawngtlai leh Mamit-ah vawk pul hri, African Swine Fever (ASF) avangin vawk tam tak a thi leh tawh a, engemawzat suat an ni. Aizawl district-a ran vulh an him zel theihnan Aizawl district magistrate Er Lalhriatpuia chuan mipui zawm tur thupek chu dan tlawhchhan hmangin a chhuah.
Aizawl district chhungah ram dang atanga vawk, vawksa leh vawksa atanga siam eitur chi reng reng lakluh khap a ni a. State dang leh district dang, vawk hri (ASF) lenna (infected area) atangin vawk, vawksa leh vawksa atanga siam eitur lakluh khap a ni bawk.
Vawk damlo reng reng talh leh hralh khap a ni a. Vawk damlo chu dah hran thuai tur a ni. Vawk thi reng reng, bawlhhlawh paihna hmunah leh lui kawr remchangah paih loh tur a ni a. Vawk thi chu thuk tak (feet 6 tal) a thuka phumin, chinai kg.2 vel tala phul tur a ni. Vawk in leh a vel pawh disinfect vek turin a ti.
Vawk damlo leh thi an awmin AH&Vety official-te hnenah hriattir thuai turin a ti a. Ti lo an awm a nih chuan action lak a ni dawn tih a sawi a ni.
Aizawl district-a khua leh khua emaw veng leh veng emawa vawk lak tur reng rengin vawk hrisel tha chauh la turin a ti a. ‘Infected area’ a puan an awm a nih chuan chumi hmun atangin vawk lakluh leh lakchhuak loh tur a ti bawk.
He thupek hi tih danglam a nih loh chuan thla hnih chhung a huam dawn a, zawm lo chu Section 223 of BNS 2023 hmanga hrem an ni dawn tih a sawi a ni.
Aizawl district-ah hmun dang ami vawk leh vawksa lak khap
