Thawhleh tlaia Indian I League khelah Aizawl FC chuan hnehna pawimawh tak an chang a. Mimuala an khingpui Sreenidi Deccan chu 2-1 a hnehin, point thum hlu tak an hmu. Thawhleh zana inkhel dangah Mohammedan SC chuan an mikhual TRAU FC chu si ruk fai ngawtin an sawp ve bawk.
Naihati Stadium-a lenglut Aizawl FC hian bul an tan tha a, goal an thun har lo. Darkar chanve an khelh tlin hma hret minute 26-naah R Ramdinthara chuan hmahruaina goal a thun. He goal hmang hian hun rei tak chhung hma an hruai.
Hun pangngaiah goal a luh belh theih loh hnuin minute 90+1 ah Bawlte Rohmingthanga chuan AFC goal hnihna a thun a, an hmahruaina a tizau. Hun pek belhah pawh 2-0 a hma an hruai vangin AFC hi chak ngei tura ngaih a ni. Ai hnih faia chak ngei tura ngaih an nih laiin an goal hnihna thuntu Bawlte Rohmingthanga chu minute 90’+6-ah hnawhchhuah a ni.
An mualah tam zawk an nih hnuin mualneitu Sreenidi Deccan an phur thar a, goal an thun nghal thuai bawk. Minute 90+7-ah Pawan Kumar chuan goal thunin an si phurh a sut then. Goal an thun vangin Sreenidi Deccan hi phur thar viau mah se goal dang thun belh turin hun an nei ngah tawh lova, an mualah hreh tak chungin an tlawm zui ta a ni.
I League 2023-24 season-a an khelh hmasak berah Aizawl FC hi tlawm mah se, inkhel hautak takah Sreenidi Deccan an hneh a, point thum hlu tak an hmuh vangin an phur a, inrintawkna sang zawk an neih belh. Aizawl FC hian khelh hnih atanga point thum hmuin pariatna an luah mek a. Sreenidi Deccani hian khelh thum atanga point ruk hmuin, pahnihna an luah ve mek thung.
Thawhlehni a inkhel dangah Mohammedan SC an khel tha chhunzawm a, an mikhual TRAU FC chu si ruk fai ngawtin an sawp. Mohammedan SC tan hian Mizo player David Lalhlansanga chuan goal hnih a thun a. Lalremsanga Fanai leh Samuel Lal-muanpuia ten goal khat ve ve an thun bawk. Mohammedan hian khelh thum atanga point 9 hmuin hma an hruai chhunzawm zel.
Aizawl FC an chak
