Nimin, Thawhlehni kha NE India atanga I-League champion hmasaber leh tun thlenga hmarchhak atanga India champion ni thei awmchhun la ni reng Aizawl FC kut khatih laia Indian top flight title a luh ni champha a ni a; he ni denchhen hian Mizo team chuan Mizo mipuite chibai bukna an tichhuak a, an thlawp thinnaah lawmthu an sawi thar leh bawk.
Kum 2017 April ni 30 zana Shillong khawpuia Aizawl FC-in champion nomawi an chawi nawlh khan India leh khawvel a barakhaih hle a nih kha!
An champion champha a lo thlenin president Robert Romawia Royte chuan Aizawl FC fans leh Mizo mipuite chibai bukin, Aizawl FC an tan tlat thin avangin lawmthu a sawi thar.
I-League champion nih manah AFC khan India aiawhin Asia League hial season khat chhung chu an khel a, tun thleng hian NE India atanga Asia League khel pha awmchhun an la ni reng a ni.
Tunah hian Aizawl FC hi tlakhniam nei loa I-League a club senior ber a ni mek a, kumin hian Manipur club pahnih chu an tlahniam (relegate) dawn a nih hmel.
Aizawl khawpuia Aizawl FC home match an rawn khelh loh avang khan All India Football Federation (AIFF) lam chuan hremna engemaw taka lekkawh ngei rin a ni a, tun dinhmunah AIFF hian AFC point hmuh zat tur a la tifel lo a, AIFF dan ding lai ang chuan he’ng match hnihah hian Aizawl FC hi point thum ve ve hmu tura ngaih a ni.
Chuti a nih chuan tun season-ah hian points 31 hmuin Aizawl club hi league table-ah pariatna ni ang.
Aizawl FC striker Lalrinzuala chuan tun season-ah hian I-League a Indian footballer record thar siamin goal 15 a khung tling a, Mohammed Fafi leh Sunil Chhetri-te’n goal 14 ve ve khunga hun rei tak record an lo vawn tawh kha a rawn khum ta a ni.
Zuala hian AFC home match vawihnih khelh theih tak loh kha khelin Mualpuiah NEROCA leh TRAU hmachhawn thei ngat se a record thar siam hi a khum nawn hial thei tura ngaih ngheh a ni.
Aizawl FC hian India champion an nih kum ang em em khan thawm neilian zui ta lo mah se tunlai hian academy changtlung zawk dinthar tumin hma an la mek a ni.
Aizawl FC champion champha herchhuak
