MFA I-Day football tournament 2026 chu August 11, Thawhlehni khan quarter-final khelh zawh a ni a, Aizawl FC leh Chanmari FC ten awlsam taka hnehna chang ve vein semi-final an lut. Semi-final hi Ninganiah khelh a ni ang.
Thawhlehnia inkhel hmasa zawkah I League champion hlui Aizawl FC leh Saikhamakawn FC te an inhmachhawn a, AFC in 4-0 ngawtin hnehna an chang. Aizawl FC tana khel tha tak; goal thum thuntu Zomuansanga chu Player of the march ah thlan a ni.
Aizawl FC leh Saikhamakawn FC te hian inhnehtawk takin bul an tan a, chawlhlawk hmain goal lut a awm thei lo. Chawlhlawk hnu lamah erawh goal li ngawt a lut thung. Chawlhlawk hnu lam hi Aizawl FC chan a ni a, goal li ngawt an thun. Aizawl FC tan hian Vincent Lalduhawma chuan second-half tan atanga minute hnihna lekah hmahruaina goal a thun.
Hmahruaina goal a thun hnuin AFC an khel tha leh zual a, na taka an khingpuite nawrin goal thum ngawt an thun belh. AFC tan hian Zomuansanga chuan goal thum thunin hattrick a siam.
Saikhamakawn FC in an si phurh sut ngei tumin tan khawh thin mah se an hlawhtling zo lo. Hun puma an goal an thun theih loh vangin semi-final luh an tumna an puitlin zo lova, quarter-final paltlang zo lovin an tla zui ta a ni.
Chanmari FC in Ramthar an sawp
MFA I-Day football tournament 2026 quarter-final hnuhnung berah Chanmari FC chuan an khingpui ramthar Veng FC chu si nga fai ngawtin an sawp a, awlsam taka hnehna changin semi-finan an inhlangkai
Chanmari FC hian Ramthar Veng FC lakah an khel tha viau a, chawlhlawk hmaa goal khat an thun bakah chawlhlawk hnu lamah goal li lai an thun belh leh bawk. CFC tan hian Lalthanzuala chuan minute 30-naah hmahruaina goal a thun a, 1-0 a hmahruai chungin chawlhklawk an hmang.
Chawlhlawk hnu lamah Chanmari FC an khel tha leh zual a, goal li ngawt an thun belh leh. Hnufual zawk an nih vanga goal thun mamawh Ramthar Veng FC an chesual nawn leh a, Eddie Lalhmangaihzuala chuan an lamah ti-goal in CFC goal hnihna a thunsak.
2-0 a hma an hruai hnuin Chanmari FC an khel tha chhunzawm a, goal thun tuma tankhawh chhunzawm zelin an hlawhtling leh thuai. Own-goal a awm atanga minute thum hnu lekah Chanmari FC tan Joel Lalramengmawia chuan an goal thumna thunin an hmahruaina a tizau leh zual. CFC goal thumna thuntu Ramengmawia hian minute 76-naahan goal lina a thun belh zui leh cheu a, an hmahruaina a tizau leh zual.
Si li fai ngawta hmahruai a, an chak dawn tih chiang tawk viau mah se Chanmari FC in an duhtakw mai chuang lo. Goal thun belh ngei tumin an khingpuite an nawr zui a, hun tawp dawn hnaih minute 88-naah Freddy Lalrinkima chuan an goal ngana a thun a, a tawp a khar. Freddy-a goal thun hnuiin goal dang a luh belh thei tawh lova, Chanmari FC chuan awlsam taka Ramthar Veng FC hnehin semi-final an lut. Semi-final-ah khingpui hautak zawk an neih a ngai dawn a. Aizawl FC nen final luh an inchuh dawn.
MFA I-Day football tournament 2026 semi-final hi August ni 13, Ningani-ah khelh a ni dawn. Kanan FC leh MLS an intum hmasa ang a, Aizawl FC leh Chanmari FC an intum zui ve leh dawn bawk.
Aizawl FC leh Chanmari FC an chak awlsam
