Aizawl khawlai leh ruihhlo

Sawrtkar leh Central YMA hnuaia ruihhlo dotu pawl CADS ten chhun leh zan thlu lova theih tawp chhuaha khawlai thenfai hna an thawk mek chung pawhin, tun lai hian Aizawl khawpui chhungah ruihhlo ngaite ualau takin an inlar nasa leh ta hle a. Thu dawn danin tunlai hian ruihhlo a váng deuh a, a vàn avang hian ruihhlo ngaite an mangang a, ruihhlo zawngin ualau takin khawlaiah an pung ta a ni ber awm e. Hetia ualau taka inlar an pun tak chhan hi, sawi leh sawi hnu, ruihhlo a vàn avangin ruihhlo zuartute hi ruihhlo ngaite hian an zawng kual nasa ve thin niawm tak a ni.
Ruihhlo ngaite’n ualau taka khawlaia ruihhlo an zawng leh a zuartute nen khawlaia an indawr thin te, kawmkar biru lai pawh chuh lem lova ualau taka lo inchiu ngawng ngawng te pawh hmuh tur an awm thin thu hi hun rei tak atang tawh khan sawi rik a lo ni tawh a. Mahse, hei hi reh lam aiin a pung tial tial zawk emaw tih tur a ni.
Faina leh thianghlimna lamah tan kan la mek a, khawlai bawlhhlawh thianfaiin kan hnatlang suau suau hlawm a, tourist-te pawhin khawpui chhung fai an tih thu social media lamah an thehdarh chuai chuai bawk a. Chutih laia ruihhlo kaihhnawiha hetianga kan khawpui ber khawlai a tawp viau si hi a inhmeh lovin, hei hian khawpui hmelhmang a tibawrhbang nasa hle. Khualzin thenkhat zingah, kan mawina aia kan mawi lohna lam tuipui tlat hi an awm tan niin a lang bawk.
Heng thilte hian khawpui a titawp mai pawh ni lovin, khawpui chhung ralmuanna an tiderthawng bawk. Ruihhlo ngaite hi damlo chikhat an ni kan tih mek laiin, an mamawh phuhrukna tur a nih chuan pawisak an nei tlem tawh thin a, chu chuan rukrukna mai piah lamah, khawlaia veivakte rawk duhna a hring chhuak a, inrawk satliah mai piah lamah, mihring nunna atan hial pawh a pawi thei bawk. Khawlaia insualrawn a thlen fo chhan pawh hi ruihhlo avanga pawisak neih tawh lohna ‘result’ zel a ni. Kan hre vek a, kan hmu vek bawk a, a takin kan tawng mek tawh a nih hi!
Hei bakah hian, ruihhlo zuartute zingah, two wheeler taxi service te pawh an inhnamhnawih hial anga sawi thawm awm te pawh hi thuneitute hian bawhzui deuh se a duhawm hle.
Mipui lam pawh kan tanrual a tul ta hle. Sawrkar leh CADS hmalakna lo ralkhat thlir ringawt hi a tawk lo va, sawrkar thuneitute tha tichak zawnga lo tanpui (back up) thiam a pawimawh dawn hle. Heng ruihhlo zuartute leh ruihhlo ngaite hi khawlaia ualau taka mipui tiralti zawnga an khawsak reng hi i phal lo ang u. Tu te pawhin mobile phone kan hum vek tawh a, awlsam tea evidence tha tak siam theih a ni tawh. Hetiang zawng tala mipui lamin hma kan lo lakpui ve loh chuan, sawrkar leh CADS te hmalakna ringawt hi chu a tawk lova, an hmu seng lova, an man seng lova, an mit leh an kut leh kea mipui lam hi kan lo tan thiam ve a, kan tanrual thiam phawt chuan, Aizawl khawlai hi tun aiin a thianghlimin a muanawm sawt ngei ang!