Tunhnaia Aizawl khawpui kawngpui siam a nih theih chhan chu MNF a sawrkar laia huaisen taka hma a lakna rah a ni tih MNF hruaitu Dr R Lalthangliana chuan a sawi.
Inrinni-a Phuldungsei-a Dampa MNF West Block Leaders’ Meet a hmanpuinaah Dampa bialtu MLA Dr R Lalthangliana hian, contractor hna thawk tha lo chu court-ah MNF sawrkarin a khing a, a khin hnehna penalty sum tlingkhawm vaibhelchhe 90 leh nuai 60 hmangin Aizawl khawpui kawng hi siam a ni tih a sawi.
“MNF-in Mizoram pawn thlenga huaisen taka court-a a din rah a ni. Aizawl khawpui kawng thawmthataah hian MNF-in ZPM aiin tha kan thawh hnem zawk a, credit pawh 70% chu kan hauh ngam. MNF sawrkar sum hlawhchhuah bakah kawng siamna tur oil man atanga chhiah sang uchuak min khawn ngaihtuah chuan hei aia tha kawng neih hi kan phu hle,” a ti.
AMC-ah kum 10, term hnih a zawnin MNF a sawrkar tawh a, mipuiin ko thlak ve riha midang enchhin an duh tih MNF senior vice president ni bawk Dr R LaLthangliana hian sawiin, “Mizoram puma MNF dinhmun tilangtua hman theih a ni lo. Inenfiah leh inzirna atan tangkai takin kan hmang mek,” a ti. Hetihlai hian Dampa bial leh Zoram hmun hrang hrangah MNF zawm thar Pathianin a pek belh zel niin a sawi bawk.
Aizawl khawpui kawng siam theih a nih chhan khan MNF huaisen rah – Dr R LaLthangliana
