Aizawl khawpui hi a lun mep mep khawp mai a, chhun lamah chuan lirtheia tlan zung zung pawh a theih loh tiin a sawi theih ang. Ruihhlo a ngampa a, ruihhlo vangin Aizawl khawpui hi a lun tia sawi ngam a ni.
Khawpui hmun laili laiah zalen takin ruihhlo a lei theih a, ruihhlo-ah hian heroin a ni ber ang, ganja pawh a zalen.
Khawlai tawngkamah heroin zawrh hi ‘vawrh’ tiin an sawi a, khaw engah heroin hi ngampa takin an vawrh thin. A vawrh hi hmuh mai theihin an awm a, anmahni lo changtu an awm reng bawk.
A ti thinte sawi danin, zing lam leh zan lam hi Aizawl khawlaia heroin lei tur a tam ber lai a ni a, chhunah hian lei tur awm tho mah se zing lam leh zan lam ang chu a ni lo.
Chhun lamah a “vawrh”-tute an tawm deuh a nih pawhin a rui thinte erawh an tawmim lo a, chhun pachangah langsar takin an rui a ni mai lo, vantlang hmunah an inchiu mawlh mawlh thin.
Hmun lun laiah ruihhlo khawih lai hmuh tur a tam a, inchiuna hmanrua, an hman hnu pawh a tam.
Vanapa Hall bul vel hi a vawrhtute leh a leitute inlanna hmunpui a tling a nih hmel a, heng lai velah hian nilengin ruihhlo khawih lai hmuh tur an awm tiin a sawi theih ang. An thu bial a, an inchiu mai a, meng hlei thei lo, khawngaihthlak tak tak pawh an awm. A bul step leh kawng sir velah inchiuna hmanrua leh thisen hmuh tur a awm fo bawk. Heng lai velah hian ruihhlo sulhnu hi hmuh hrehawm khawp a awm a, patling pawhin hrehawm an tih thu an sawi thin.
“Puitling tan pawh heng lai vela kea kal hi a hrehawm a, ka ngaihtuah fo chu naupang hi a ni. Naupangin hetiang an hmu tur hi dik ka ti thei lo,” heng lai vel kal tlang thin pa pakhat chuan a ti.
Mizoram Excise & Narcotics department lam chuan Aizawlah hian khaw dang atanga ruihhlo ngaihvena kal an pung tih an sawi a, mahni thlennaa haw lova khawlaia tal mai mai an awm thin tih an sawi.
Aizawl khawpuiah ruihhlo ngampa
