Tunhnai ruahsurah leiminin inkalpawhna kawng hrang hrangah harsatna a thlen a, sawrkar leh khawtlang tangrual chuan theih ang angin an thian zel.
Aizawl khawpui leh hmun dang tana ei leh bar chawk luhna kawngpui ber, Lengpui Airport panna kawng ni bawk, National Highway-6 Hunthar lei tlahniam chu Inrinni leh Pathianni pawh khan PWD-in a hnawh leh siamthat hna an chhunzawm a. Ruahsur apianga lei hi a la chet avangin khawih a sawt lo hle a, theihtawp chhuahin an khawih zawm zel tih PWD hotute chuan an sawi.
Hunthar lei tlahniam hian lirthei veivak a tibuai nasa a, ei leh bar bakah chak dang mamawh phur truck ho pawh duh anga an tlan theih loh avangin Rangvamual Truck Terminal-ah truck 100 chuang dinkhawm tir an ni a, Traffic Police ruahman angin a inchhawka chhuah tir thin an ni.
Thuampui to Selesih Road, Muanna Veng, TNT peng bul kawng hnawhtu leimin chu PWD-in Pathianni khan an thian a. Helai kawng hi fur leh ruahtui tam laiin leimin a tam thin a, kar hmasa lawk pawh khan kawng a hnawh tawh a, rang takin a thenfai hna an thawk tih PWD hotute chuan an sawi a ni.
August 22 khan Chanmari West kawipui to Edenthar panna kawngchhak atanga leiminin kawng a tidiak nasa hle a, Inrinni khan PWD leh Edenthar khawtlangin lei diak nasa tak hi tifaiin an hnatlang a, tui nen phuh fai vek a ni.
Inrinni vek khan Zonuam Vengah August 24 zana lung leh leimin nasa tak leh MHNL Road, Ebenezer to High Court Road-a leimin paihfai hna chu PWD hian an thawk bawk a. Leimin an paihna tur hi a vang thin a, man chawia paih a ngaih chang a awm bawk a, paih fai chak a har thin hle tih PWD hotute chuan an sawi a ni.
Aizawl North-III bialtu MLA, Disaster Management minister ni bawk K Sapdanga chuan a bial chhung Hunthar Venga leiminna hmun pahnih – Chanmari West – Edenthar leh Hunthar lei tlahniam hi Inrinni khan a tlawh a, PWD-in chak zawka hna an thawh theih nan Police leh Traffic Police duty dan tur a sawipui nghal a ni.
Aizawl leh dai vela kawng hnawhtu thian
