July 15 chawhnu lama ruahsur nasa nghawng kal zelah Aizawl khawpui laili luhna kawng leimin leh hnawlin a hnawh nual a, a theih ang anga thenfai ni mah se, thenfai mai theih loh leh a tlak belh leh hlauhthawnawm a awm nual. Heng zingah hian Bawngkawn atanga Durtlang panna kawng pawh telin, lirthei tlan theih loh tura khar rih a ni.Bawngkawn huamchhung, Durtlang Road-a leimin avangin Bawngkawn – Durtlang Road chu Thawhlehni atang khan khar a ni. Leiminna hi tunhnaia lei tlak tawhna, kawng chhak lama mimal rama lei laih vanga che ta kha a ni a. Thawhtanni chawhnu ruahsur lai khan che thar lehin, Thawhlehni zing khan a tlak belh bawk a, kawng a hnawh vek a ni.
Thawhlehni zing khan District Disaster Management Authority Aizawl chairman, bawrhsap kaihhruaiin Aizawl Municipal Corporation, Geology & Mining, PWD leh a kaihhnawih department dang atanga mithiamten joint inspection an nei a. Inspection neih lai hian lei tla leh mai thei a la awm avangin chhiatna thleng palh a awm loh nan kawng khar nghal a ni.
Joint Inspection Team hian a hmun laitu Lalhruaisanga, Chawntlangpui, Lawngtlai district chu rang taka leimin chhunzawm thei laite tifai nghal turin an hriattir a. Hna a thawh zawh veleh Aizawl DC/DDMA hnuaia Quick Response Team kaihhruaiin a hmunhma hi tha takin khuh nghal tura ruahman a ni. Kawng kal tan a him tih a chian hnuah chauh kawng hi hawn nise, tih a ni.
Leiminna hmunah hian lei laih phalna (SD&SM permit) an pe lo tih AMC hotute chuan an sawi a. Kum khat chuang kaltaah khan leiminna chhak deuhah hian Lalhruaisanga hi uluk taka leilaih dan tur khuahkhirhna (condition) siamsakin, lei laih phalna permit pek a ni a; mah se, permit ang thlap hian vawiin thlengin hma a la loa, a permit hi a thi tawh nghe nghe tih sawi a ni.
Hetihlai hian Thawhtanni leh Thawhlehni lamah Melthum, Muanna Veng leh Zemabawk lamah pawh leimin a awm a; theih ang anga thenfai nghal zel a ni.
Aizawl luhka kawng hnawh Durtlang kawng khar lailawk
