Vawk natna hri, African Swine Fever (ASF) chu Aizawl bikah a darh tial tial a, veng pakua a tuam tawh nia ngaih a ni. He natna hi Mizoramah a awm nghet tawha ngaih a nih rualin, tunhnaia a rawn lan leh chhanah state pawn atanga lakluh vawksa frozen leh vawksa atanga thilsiam dang a tel thei nia ring an awm.AH & Vety department chhinchhaih danin, tunhnaia ASF leng tharah hian a tirah Aizawla veng pahnih – Salem Veng leh Kulikawn chiah a tuam a, a hnu ah Maubawk leh Dinthar chu a lut ve leh nia hriat a ni. Maubawk bik hi chu a tira ASF kai nia ngaih vawk 4 suat bak chu ASF vanga vawk thi a awm hriat ala ni lo reng a, suat belh pawh a awm tawh chuang lo. Dinthar pawh ASF vanga vawk thi pahnih an neih bak, he natna avanga thi emaw suat ngai emaw a awm zui lo bawk.
Hemi hnu hian Armed Veng leh Khatla South ah a darh ve leh a, Khatla South pawh hi tun dinhmunah chuan a la zia viau nia ngaih a ni. Edenthar, Falkland leh Republic Vengah ASF hi a lut ve leh nia hriat a ni a, Falkland bikah hian vawk 32-in an thihpui tawh.
May 2 thleng khan Mizoram pumah tunhnaia ASF lengah hian vawk 403-in an thihpui tawh a, he hri kai vawk 112 tihhlum an ni tawh bawk. A lenna hmasa Champhai district-a khaw pahnih leh Lunglei district-a khaw pahnih bakah Saitual district-a khaw pakhatah chuan a darh zui tawh lo nia hriat a nih laiin, Saitual khua leh Khawzawl district-a Dulte ah chuan he hri avanga vawk thi an la awm zel.
Aizawl vawk vulhtu pawl lam sawi danin, sawrkarin dan hnuaia lakluh a phalsak vawksa frozen leh vawksa atanga thil siam dang chu ASF luhna kawng hawngtu a ni thei niin an hria a, hemi chungchang hi AH & Vety minister leh director bakah chief minister pawh an lo sawipui tawh tih an sawi.
Kum 2022 December 2-a Mizoram sawrkarin hriattirna a tihchhuahah vawksa frozen lam lakluh phal loh thin chu Krismas leh kumthar vuakveta vawksa mamawhna a san avanga tualchhung atanga hmuh theih bak vawksa frozen phal a nih thu a sawi chu sut awm loin, tunah hian APEDA emaw FSSAI-in a pawmpui firm atangin state pawn vawksa leh vawksa atanga thil siam lakluh phal a ni ta reng a ni, tiin, hei hi a him lo hle nia an ngaih thu an sawi a ni. Heng thil laluttute ai hian, vawksaa intodelhna tura beitu tualchhug mite thu chuan ngaihpawimawh a hlawh lo zawk nia ngaih theih a ni thin chu pawi an tih thu an sawi a ni.
Tuna ASF leng hian tam thama vawk vulhtute pawh hmun thenkhatah a luhchilh tan a, theih ang tawkin an inveng tih an sawi.
Aizawl veng 9-ah ASF lut tawh ASF luh theihnaah frozen ringhlel
