Aizawl west 3 derby thlirtu thahnem
Nursery veng vannei, Khatla South vanduai thung!
Point 40 zet nei Emmanuel-a’n an veng Nursery a chakpui a, inkhel hmuhnawm fal bikah hian a tir point 13 chu he tlangval kut atanga chhuak vek hi a ni.
Icfai University Inter veng U 23 semi final inkhelah Zarkawt veng zuiin Nursery vengin final an lut.
May ni 23, Ningani zan khan Khatla South-in hun tawp dawnah inkhel hmelhmang thlak dawrh theihna an palian Marius-a hmangin an nei a, inhliam avanga lak chhuah ngai zeuh zeuh thin he tlangval hian hun tawp dawnah a hun rangkachak neih a bawh pelh a, Khatla South 82-84 in Nursery veng lakah an tlawm zui.
Nursery veng hi an squad a thain, a chhah a, palian pawh an kawl lian nual. He’ng karah hian hming lian bik pawh a awm – Emmanuel-a!
|anna hamrik a ri a, Nursery an dawk zawk nghal, veng pahnih fans an in au chhawk a, Mriv khualtha BFI technical director Isaac Norman-a pawhin a chil a lem khawlh khawlh – hmuhnawm a ti.
“U 23 level-ah he’ng aia hlut hlawh leh boruak tang hi India ram khawiah mah a awm lo!’ a ti sup.
Referee hamrik a rik rualin veng pahnih fans an te nghal thuai zel – inkhel a HOT, tul lova foul a tam hle!
Nursery veng super star Emmanuel-a a langsar ber a, a 3 pts luh thaih thaih thin karah 2nd quarter tawp lamah erawh foul trouble a nei zui a, lakchhuah a ngai, an veng tantute an hlauthawng tih a hriat a, he nau chhuah rual hian a reh duk hial!
Team khel hmuhnawm zawk leh a um zawka tang Khatla South an phur zual sauh a, 2nd qtr tawp dawn minute 1:14-ah tlu chungin Abraham-a’n a nau Joel-a ‘killer pass’ a pe a, Joel-a’n 3 pts a lut zui a, tantu ngah zawk Khatla South mipuiin hall chhungah lam an thai, pui tak a ni.
Hmachhuana, an star player erawh a reh, ball a hmu hlei thei lo. Half time a ni zui a, Nursery 49 – 44 Khatla South.
3rd quarter a thleng a, Khatla South ta ni thin kha Nursery coach Atluanga’n a hre kar a, an defense a khawng sauh – awlsam taka Khatla South taltir a tum lova, point 15 chiah Miller-ate’n Khatla South he quarter-ah hian an score tir, anni lamin point 30 lawih an nei thung.
Hawla Indoor Stadium chhuatah dai a far a, a nal em em a, player-te’n an theihna an phochhuak hlei thei lova, an tlu reng – Mizo tlangval ruihhlo laka fihlim mahni veng theuha an thlamuanpuite inelna hmun hi ngaihsak a ngai zual hle.
Khatla South big man Marius-a a inhliam a, an coach Opa Varte game plan a buai tih a hriat!
A tawi zawnga sawi chuan Khatla South game mawi teh mah se Nursery super star Emmanuel-a danna damdawi an nei lo, an tuar a, an chak loh phah!
He inkhelah hian Nursery veng tan Nunpuia (17 pts), Reuben (10pts) leh Sangsanga (15pts)-te’n an hun tha an hmangtangkai vek a; Khatla South tan Joel (10 pts), Marius (12 pts), Jojo (15 pts) leh
Hmachhuana (24pts)-te an khel chhe hran lo.
Basketball hian lawmna leh mittui a keng tel a, kan hmu nawn leh thin.
1st qtr 2nd qtr 3rd qtr 4th qtr
22 – 24 27 – 20 15 – 30 18 – 11
Khatla South 82 – 84 Nursery
Hoops Mania Time Out
Zanin dar 8 hian final khelh a ni dawn a, mipui an rawn thawk chhuak tha leh dawn chiang sa; mahse, semi finals anga Nursery veng an rawn thawhchhuah that tawk loh chuan fans nei tha bera chhal ngam Zarkawt veng awmze neia au rual thin hmaah an tlangvalte an zam a hlauhawm hle.
Isaac Norman Aizawlah
Mizoram basketball referee inzawmkhawm pawl Mriv in The Basketball Federation of India (Mriv) technical director Isaac Norman chu Icfai University Inter veng U 23 an buatsaih mek chhim turin an chah chhuak.
Mriv-te hian technical lama hmasawnna an ma-mawhte Norman lo kal lai hian hun remchang an dap a, referee clinic an neih bakah an mamawhte an thlen a ni.