Aizawl Sustainable Urban Transport Project (ASUTP) chungchanga hmalakna leh dinhmun sawipuiin Mizoram State Planning Board vice chairman H. Rammawi, UD&PA hotute leh ASUTP consultant Mott Macdonald Pvt Ltd. mithiamte chuan Ningani khan chief minister Zoramthanga an hmu.
Mott Macdonald Pvt. Ltd. hian 2022 January atang khan ASUTP atan hma an lak tan hnua an thlen chin chief minister hi an an hrilh a. He project hnuaiah hian Aizawl leh a chhehvel tan Comprehensive Mobility Plan (CMP) chu Project Management Unit UD&PA department kaihhruaiin Project Planning, Design and Management Consultant – Mott MacDonald Pvt. Ltd. hian a buatsaih a. CMP hian a tum ber chu, tun atanga kum 20 chhung atana Aizawl khawpui than dan mila mipui chetvel leh veivahna awlsamna tura ruahmanna siam a ni. July 12 khan ‘Workshop to Finalize Scope and Work Plan for Feasibility Studies for Identified Projects’ tiin zirhona buatsaih a ni.
Chief minister bulah hian project thawh theih tur enchianna, feasibility study an neih tawhte an sawipui a. An project zingah ropeway/ cable car service, City Bus service tihhmasawn leh maxi-cab, bus leh truck tana terminal siam, multi-level off-street motor vehicle parking (car parking chhawng), khawpui chhunga mipui chetvel awlsamna turin lift leh escalator dah leh Aizawl tlaklama Aizawl bypass road siam tur zuk pawh dan turte a tel.
Aizawla chetvelna tur ruahman dan CM sawipui
