Ministry of Youth Affairs & Sports, Sports Authority of India (SAI), Association of Indian Universities, Indian Olympic Association leh National Sports Federation tangho buatsaih Khelo India University Games (KIUG) 2023 hnuaia mipa football inelna chu Thawhtanni khan Rajiv Gandhi Stadium Mualpui Aizawlah tan a ni.
A hawngtu Khelo India University Games Executive Committee (Mizoram) chairman, Sports & Youth Services minister Lalnghinglova Hmar chuan Khelo India University Games hnuaia infiamna discipline hrang hrang zingah Mizoramin mipa football inelna a thleng chu lawmawm a tih thu a sawi a. India ram kil hrang hrang atanga footballer leh anmahni tawiawma Mizoram pantute an lo lawm tih a sawi. Aizawla mipa football inelna chu tun Khelo India University Games kal mekah a hlawhtling ber a nih a beisei thu a sawi bawk.
Team pariat inel turte chu state pali atang chauha lokal an ni naa, hei hian football inelna chu inelna dang ang ngawt a nih loh zia a lantir tih sawiin, “India rama ‘Traditional Football Power House’ tia hriat hlawh Kerela, Punjab, W. Bengal leh Maharashtra atanga university football team in rawn tel hi a lawmawm a; football hmanga infiamna mawi lantir bakah inunauna tha siam a nih ka beisei,” a ti.
Football chu infiamna chauh ni lo, eizawnnana thalai tam takin an hman tawh thu Lalnghinglova Hmar hian sawiin, Indian footballer-ten hlawh tha tak tak an nei tawh a. University zirlai footballer kalkhawmte chu lehkha thiamna mai bakah football thiamna hmanga national mai nilo international level thlenga hlawhtlinna chang thei tura theihtawp chhuah turin a fuih a ni.
Khelo India University Games hi India rama university level inelna sang ber niin, kumin hian North East India-a state 7-ten an inthlen tawm a, Assam chu main host niin, sports discipline 15 a thleng. State dang zawngin sports discipline pakhat theuh an thleng thung a, Manipur erawh an ram a buai avangin an thleng dawn lo. Infiamna discipline hrang hrang hmangin intihsiak a ni dawn a, February 19- 29 chhung a awh ang.
Mipa football inelna bik kaihhnawihah hian infiammi 176, supporting staff 25, technical official (AIFF) 23, general official 50, sports specific volunteer 18, MYAS & SAI official-te bakah nodal department Sports & Youth Services kaihhruai line department hrang hrang telna Local Organising Committee member engemawzat an awm a ni.
Aizawlah football hmanga university ho inelna nei tan
