Aizawlah hnama harhna intawhkhawm
Zoram Thar Zofate Lairelna Inpui chuan khawvel pum huap Zofate Hnama Harhna Intawhkhawm (Zofate National Awakening Convention) Aizawla buatsaih chu November 2 khan a tiak.
Zofate Hnama Harhna Intawhkhawm thupui chu “I thovang u khai, i din teh tak ang u” tih a ni a, palai hi Mizoram khaw hrang hrang bakah Manipur, Myanmar leh Bangladesh atangin an kal. NGO, hnam peng hrang hrang leh political party aiawhten thu an sawi a. MNF aiawh Zoramthanga, MPCC aiawhin C Chawngkunga, ZPM aiawhin PB Lalsawmliana’n a sawi. Lai Autonomous District Council atangin CEM Lalmuansanga, Zo United (Manipur) atangin Albert Renthlei, Myanmar Chin State sawrkara Chin Affairs minister Lalrinmuani, MSU president leh MZP general secretary bakah Zohnahthlak pawl hrang hrang aiawhten thu an sawi a. Mi sawmbikte hian Zofate hnam inpumkhatna thupuiah hmangin thu an sawi a ni.
Zoram Thar hruaitu RevDr Zaichhawna Hlawndo chuan powerpoint presentation hmangin hnam tobul leh Zofate hnama harhna tur a sawi a. Research a neih piahlamah Pathianin a hriattir leh a dawn chu a puang tih a sawi.
“Research uluk taka tih leh Pathian hnen atanga ka dawn danin, Zofate hi Israel hnambo niin, Zosefa thlah kal zel, Zosefa tu leh fate kan ni. Zofate hnam nihna dik tak chu ‘Zofate’ tih hi a ni a, hei lo hi hnam nihna dang kan zavaia pawm tlan kan nei lo. Zofate chenna hi Zoram vek a ni a, hnama harhin kan hnam nihna phuahchawp kan lo hman zawng zawng hi hmang tawh lo ila, kan nihna dik tak Pathian lo ruat lawk sa hi hmang tawh ila, Zoram chu a piang mai dawn a ni,” a ti.
Zofate mahnia ro in rel (independent) kan nihna turin Lalpa’n hna a thawk mek a, a takin Lalpa thawhpui theih tura kan inpuahchah vek a ngai tih Rev Dr Zaichhawna Hlawndo hian a sawi a. Tunah Zofate khawvel tana eng kan nihna tur Zofate Pathian Biak Inpui hi Jerusalem Temple Thar tur a ni tih a puang bawk.
Aizawlah hnama harhna intawhkhawm
