Aizawl khawpuia dawr hrang hrangah a neitu dik tak hnamdang leh an mi chhawr hnamdang an tam a, chhiah chawi mumal lo an tam hle niin a lang bawk tih zirchianna atanga hmuh a ni. Mizoram First chuan October 2025 chhung khan Aizawl khawpuia hnam dang, a bikin Vai-in sumdawnna an kalpui dan an zirchiang a. Kulikawn atanga Zemabawk inkar veng 24 zirchianna atangin, Aizawlah hnamdang dawr a tam tawh hle nia a lan thu sawiin, a langsar chin maiah pawh dawr 122 chhiar a ni tih an sawi. Tunhnaiah hnamdang (Vai) dawr a pung nasa hle tih a lan thu an sawi bawk.
“He survey report hian tun ang inenkawlna satliah (manual vigilance) ringawt chuan kan ram economy a venghim zo tawh lo tih a nemnghet a. A rang lama digital monitoring tool /system changkang tak hman a tul kan ti hle,” Mizoram First president ZR Thahmingliana chuan a ti.
Sawrkarah rawtna an thlen a. An rawtna thlen hi a changtu department minister theuh ‘address’ in ziakin an thlen nghal tih an sawi a. Chief minister leh department hotute hnenah an thlen tel tih an sawi bawk.
ILP vilna (real-time visitor tracking, ILP leh an hnathawhna hmun inkawp tlat (link) theihna digital system kan mamawh tih sawiin, ILP vil zui dan tur mumal a awm loh avangin ILP thi tawhin rei tak tak an awm fo a. ILP an hmuhna tak thawk loa thil dang ti daih pawh an tam thin hle tih an sawi. ILP online-a a dil theih ang hian, database hmanga vil zuina tur app tha tak siamin, ILP an lak chhan chauh an thawh theihna tura vil zui dan, ILP valid lo hriat zung zungna tur, sponsor-tu chhui theihna tur leh mawhphurhna pek theihna tur siam turin sawrkar an ngen tih an sawi.
Dan loa sumdawng mi tam tak, tourist anga an lo luh thin avangin tourist ILP a hranpa siam a tul bakah ILP nei loa Mizorama an awm reng theih lohna tura hotel/ homestay leh in luahte pawhin ILP valid demand tura order siam turin sawrkar an ngen tih an sawi a ni.
Dawr/ sumdawnna license chu a neitu hming mai ni lo, a taka kalpuitu (operator) hming nen digital-a thlunzawm a tul tih sawiin, hei hian ‘Mizo hming hawha hnamdang sumdawng’ te a tilang chhuak thei dawn tih an sawi.
Trade license leh tax filing thlunzawm a, GST pe lo leh pe tlemte awlsam taka man chhuah zung zung theihna tur system hman a ngai tih an sawi bawk.
Mizoram First zirchiannaah chuan:
8 Vaiin an nghah dawr tam zawk (76.2%) chu a neitu ah Mizo hming awm mah se, a nghaktu zawng zawng pawh Vai an nih avangin a hlawkna tel tak taktu an ni tih a chian thu an sawi.
8 Dawr langsar zual 122 an chhinchhiahah hian Vai hnathawk 342 an awm a, chu’ng zinga 34% chu ILP valid phawrh tur nei lo, Assam leh Bihar mi an tam ber tih an sawi.
8 Aizawlah hnamdang dawr lian a tam a. GST pe erawh zaa 39.3% an ni. An annual turnover-a self-declaration a rintlak meuh angem tih zawhna a lian a. A tam zawk (94%) in GST registration an tar loa, sawrkar sum hmuh tur tam tak hetah hian a putru ngeiin an ring tih an sawi.
8 Zirchianna atanga a lan danin, bungraw pawimawh bik an thunun hle a. Nitin mamawh bik – in sakna bungrua (hardware, cement, rod) leh nitin mamawh (grocery/eichawp) zawrhnaah a lian zual chu hnamdang kutah a awm deuh vek.
Aizawlah hnamdang dawr a tam Chhiah chawi loa sumdawng tam
