Aizawla nghah Commonwealth Parliamentary Association (CPA) India Region, Zone-III Annual Conference hmanpui tur Lok Sabha speaker Om Birla, Rajya Sabha deputy chairman Harivansh Narayan Singh leh official dangte chuan Ningani khan Aizawl an thleng a. State Assembly speaker Lalbiakzama, Lok Sabha MP Richard Vanlalhmangaiha, deputy speaker Lalfamkima leh state official-ten an lo dawngsawng.
Ningani zan khan Mizoram Legislative Assembly Committee Room-ah Executive Committee Meeting an nei nghal a. Vawiin, September 27 chawhma dar 11.00 ah Lok Sabha speaker hian MLA Library-a Archive Cell thar a hawng anga, dar 11.30 ah Commonwealth Parliamentary Association Annual Conference hman zui a ni ang.
Mizoram Assembly speaker-in palai lawmna thu a sawi zawhah Nagaland Assembly speaker leh CPA Zone-III chairman ni lai Sharingain Longkumer chuan keynote address a sawi ang. Mizoram chief minister Lalduhoma, Rajya Sabha deputy chairman leh Lok Sabha speaker ten thu an sawi zui dawn a ni.
Ni khatnaah hian ‘Inclusion of the Northeast Region in the India- ASEAN Vision for Trade and Cooperation’ tih sawiho a ni ang
CPA Annual Conference ni hnihna, Inrinni ah ‘Merging the Ministry of DONER with NEC for better strategic planning and coordination of various projects in the region’ tih sawiho a ni anga, hemi hnu hian Conference kharna hun hman a ni ang.
He conference hi tluang taka neih a nih theih nan Aizawl district magistrate Er. Lalhriatpuia chuan danin thuneihna a pek angin mipute zawm tur hriattirna a chhuah a. Heng hmun – Head Post Office Treasury Square, Mizoram Legislative Assembly building hnaih leh a chhehvel bakah Tennis Court atanga Treasury Square Bazar inkarah vantlang, politics, sakhuana leh thildang vangin mi 5 aia tam punkhawm leh bengchheng siam khap a ni. Thlai leh thildang zuar (hawkers) pawh an inpho chhuak tur a ni lo. Hei hian dan leh thupek kengkawhtute erawh a huam lo a ni.
Aizawlah legislator-te inkhawmpui
