Aizawlah Olympic Day Run
Mizoram Olympic Association buatsaihin Thawhtanni zing khan Aizawlah Olympic Day Run neih a ni a. Infiammiten Sikulpuikawn, Vaivakawn leh Chanmari kawn atangin Lammual an pan khawm a, Lammualah hian chief minister Lalduhoma hoin a kharna hman a ni a, Sports & Youth Services minister Lalnghinglova Hmar a tel bawk.
Chief minister chuan June 23 hi khawvel pumah Olympic movement leh sports chawilarna atan Olympic Day-a hman thin a ni a. Infiamna hmanga taksa hrisel zawk nei tur leh infiamna hmanga khawvel tha zawk – inunauna, inzahtawnna, remna leh muanna, intluktlanna leh chenho kawnga kan mamawh chawilarna atan hman a ni tih a sawi.
“Kan taksa hi hrisel taka a awm theihnan kan sawizawi that a ngai a, infiamna hi insawizawina tha ber pakhat a ni. Infiammite chu an taksa chauh ni loin an rilru thlengin a hrisel thin. Hnam hrang, tawng hrang leh sakhaw hrang pawh ni ila, infiamna hian duh thuhmun min neihtir a, thinlunga inpawhtawnna leh inunauna min neihtir thin,” a ti.
India aiawha Olympic-a inlan thei Mizo thalai pahnih chiah kan la nei tih chief minister hian sawiin, “Kan thalaite zingah India aiawh thei khawpa talent nei tha tam tak kan neih kan rin avangin 2036 Olympic thlir ranin sawrkar chuan Vision 2036 a kalpui a. Kawng hrang hrangin hma kan la dawn a ni,” a ti.
Mizoram Olympic Association secretary general V Lalzawmliana’n tunhnaia infiamnaa Mizoram hmasawnna langsar zual a sawi a. National Games leh NE Games hnuhnung bera medal dawngtute lawmman hlan an ni bawk.
Kumin Olympic Day thupui hi – “Move, Learn, Discover – Together for a better world” tih a ni.
Aizawlah Olympic Day Run
