Aizawlah Zo Fair nei mek
Sawrkar laipui Ministry of Tribal Affairs-a Tribal Cooperative Marketing Development Federation of India (TRIFED) leh Mizoram Cooperation department tangdun buatsaih hapta khat awh tur Zo Fair (Aadhi Bazaar) chu Thawhtanni khan Aizawlah chief minister Lalduhoma’n a hawng a. India hmarchhak state hrang hrang leh Mizoram atangin kutthemthiamten an thilsiam an pho chhuak.
Chief minister chuan, hmarchhak mipuiin lehkhabua kan history ziaka kan dah hma daih atang tawh khan kan puantah leh thiamhnang deh ah kan chanchin kan lo ziak kai tawh a. Tuna thil pho kan kutchhuak en hian, kum za tam tak chhunga kan lo inhlanchhawn tawh themthiamna leh kan nunphung kan hmu tel tih a sawi.
“Khawvel changkanna avangin khawl hmangin hmanraw tam tak dekchhuak tawh mah ila, kan hnam thil kan kutchhuak erawh vawiin thlengin kan dehchhuah dan a la ngai reng a. Kan hnam zia kan tah tel zel a, kan chanchin puangtute an ni. A dekchhuak thiamte in hlu a, in thiamna hi ngainepin in lo bansan mai ang tih a hlauhawm. Kan kutchhuak hi kan tana kan siam ni mah se, min duhpuitu an tam zel a, a hralhna a tha tial tial dawn,” a ti.
Tribal forest products hrang hrang vawnhim leh chawikan kawnga hmalatu ministry leh department te chungah lawmthu sawi tih chief minister hian a sawi a. State dang atanga lo kalte chu mikhual taka awm loa, chhungkua anga inpawh taka Bazar hawng tlang turin a chah.
Rural Development & Administration minister Prof. Lalnilawma pawhin, cooperative movement chu ram dangah chuan mi tam takin an hlawhtlinpui tawh a. Mizoramah pawh hlawhtlinpui tumin ke kan pen mek tih a sawi. Tunhnaia Lammuala Horti Fair an buatsaihah pawh ni khatah cheng nuai 20 hu an hralh ziah tih sawiin, chief minister sawi fo thin, Mizoram hmathlir – Viksit Mizoram 2047 thleng turin thingtlang khaw te ber thlenga khaw intodelh kan nih a ngai tih hria a, a bulthum atangin hma an la mek tih a sawi a ni.
TRIFED regional manager (NE Region) PS Thuingaleng chuan, Mizorama tualchhung thil siamchhuah ho chu hmarchhak biala tualchhung kutchhuakah a tha ber ber an ni a, a funna (packaging) mawi zawk an mamawh, tiin, chutianga an kalpui theih chuan a market lamah hma an sawn an ring tih a sawi.
Zo Fair-ah hian hmarchhak state hrang hrang atanga lokal stall 13 leh Mizoram atanga tel stall 12, a vaiin stall 25 a awm a. Heng zingah hian tribal food cuisine stall pahnih an tel a, a dang chu kuta tah textiles, mau atanga siam thilte, ei tur lam leh natural produce zawrhna an ni a. A siamtu leh a leitute inkara palai (sumdawng) awm loa indawrna tura duan a ni.
Aizawlah Zo Fair nei mek
