Al-Nassr atangin Ronaldo inputchhuah loh hmel

Al-Nassr atangin Ronaldo inputchhuah loh hmel
Football level sang bera khel zui rih turin la fit em em mah se sum tamna Arab rama inkhelh a thlang a, Saudi Arabia club hausa tawntaw Al-Nassr tan sum tam mangkheng hlawhin a khel ta a; tunthla tawp rual hian a contract neih lai a tawp ve tawh dawn a, kan hnung lawk khan bung thar a kai tur thu khawvel hriatah a puang a, a chhuak ngei dawna ngaih a nih laiin kum 40 mi Cristiano Ronaldo chuan a khelhna club-ah contract a pawtsei dawn tih hroat a ni leh ta zawk a ni.
Media-te tarlan danin Portugal captain hian kum hnih daih contract thar a ziak dawn a, Manchester United chhuahsana January 2023-a a zawm Saudi Arabian club Al-Nassr thuam a la inbel chhunzawm zel dawn niin BBC Sport chuan a tarlang.
Tarlan tawh thin angin, thla hmasaa Riyadh club-in Saudi Pro League season liamtaa an game hnuhnung ber an khelh hnu lawk khan Ronaldo hian social media lamah Arab rama a zinkawng chu a tawp ta tih a tarchhuak hluai a, khawi lamah tak kal ang maw tih chu khawvel inrinsiak dan a ni nghal.
Chu thu a tarchhuah chu Fifa Club World Cup khelh tan hma lawk kha niin, Fifa president Gianni Infantino phur pheng pawhin Al-Nassr an qualify loh avanga club tournament lian khel thei lo Ronaldo chu an tournament siamah hmuh a lo inbeisei hman a, mi bik a nih avangin United States lama Fifa huaihawt club inelna lian khel tur team a zawm a nih phawt chuan a bika hriatthiamna pek an ngaihtuah tur thu leh club inelna tiropui tur leh mi hipna atan Portuguese khelhtir dan an ngaihtuah tur thu a lo sawi hmanhmawh a nih kha!
Ronaldo thung chuan ngaihdan hran daih a lo nei a, Club World Cup khel tur team zawma nipui chawlh laia tournament khelh a tum loh thu a sawi chiang.
Chawlhkar hnih liamta khan Portugal chu Uefa Nations League-ah a han champion-pui te te a, tunah Manchester United, Real Madrid leh Juventus player hlui chuan thu thar rawn nei lehin, Saudi Arabia-a cham zui turin inremna a ziak dawn tih a ni a, Gulf rama a cham chhan tur pawh hi sum tam lutuk hlawh tura an thlemthluk leh theih tak vang ni ngeiin a lang!
Media thenkhat tarlan dan chuan Al-Nassr hian contract tharah Ronaldo hi season khata euro maktaduai 400 tehreng hlawh turin an dawr a; chuti a nih chuan India pawisaa kum khata a hlawh tur chu Rs. 40,13,04,00,000 a ni hem mai!
Pawisa inthlauhna nena chhut zelin India pawisaa a thlakhat hlawh tur chu Rs. 3,34,42,00,000 niin, chawlhkar khatah Rs. 77,17,38,461 a hlawh pha ang a; a ni khat hlawh pawh Rs. 11,02,48,351 a la ni pha cheu dawn!
Chuti taka chhawrnaawm chu a ni meuh em ti han thlir dawn ila.
Old Trafford-a a contract a tihtawp hnu khan Saudi club tan Ronaldo hian belhkhawmin game 111-ah goal 99 a thun tling tawh a; season liamta bikah khan match 41-ah goal 35 khungin, top scorer lawmman Golden Boot award a dawng nghe nghe.
Chuti tak chuan mimalin chetha leh mah se Portuguese hian a club vawn lai chu season liamta khan Saudi top flight-ah pathumna a nihpui pha chauh a, champion Al-Ittihad lakah point 13 laiin an hniam.
Hei hi ni mah se club thuneitute chuan Ronaldo hi an mawhpuh hran lo niin a lang a, chu ai chuan tunkar Nilaini khan AC Milan boss hlui Stefano Pioli chu kum khat pawh an inrawih tlin hmain an ban fel ta zawk a ni!
A club hlui Fiorentina lama kirleh tura ngaih Italian manager Pioli chhuah thu nemngheh a nih hnu lawkah Ronaldo hian social media kaltlangin an coach chhuak ta kum 59 mi laka lawmthu sawina a tarchhuak nghe nghe.