Turin khawpuia ATP Finals 2023 khelh mekah nilai zan khan Carlos Alcaraz chuan set hloh lovin Andrey Rublev a hneh a, inelna neih mekah a vawi khat nan a chak. Red Group-a inkhel dangah Daniil Medvedev chu Alexander Zverev hnehin a chak zawn a, semi final a lut.
Player ngaihven hlawh ni chunga inlan Carlos Alcaraz hian Red Group-a a khelh hmasak berah beisei a phak lova, Alexander Zverev lakah set la hmasa zet mah se, set hnih hloh zawnin a chak lo. ATP Finals a khelh vawi khatnaah chak lo nghal mah se a khelh hnihnaah a insiamtha a, hnehna changin beseina thar a insiam.
Alcaraz hian amah ang thova tlawm chunga bul tan Rublev a hmachhawn a, chak mamawh ve ve an ni bawk a, chak tumin tan an khawh nasa dun hle. Set khatna tir lamah an inhnehtawk viau a, game an inlakchhawk nghal zak zak. Game an inlakchhawk zak zak hnuin hun pawimawhah Alcaraz a che fuh a, break pawimawh tak a nei. Break a neih a chhawr tangkai zui a, set khatnaah game nga hloh chungin set a la.
Set khatnaa a hloh vanga mood fuh lo, tum deuh bur reng Rublev a khelchhe chhunzawm a, set hnihnaah a che hleithei meuh tawh lo. Set hnihnaah hian Spaniard Alcaraz hian tum hnih break a nei a, game hnih chiah hloh a set la in a khingpui Andrey Rublev chu 7-5, 6-5 in a hneh zui ta a ni.
World No. 2 Alcaraz hian semi-final lut chiang tawh Daniil Medvedev a hmachhawn zui leh dawn a, semi-final lut turin Medvedev lakah chak ngei ngei a mamawh. Tunlaia khel tha tluang tak Medvedev nen hian US Open semi-final-ah an lo inhmachhawn tawh a, Alcaraz hi tlawm zawkah a tang a, a trophy kawl mek a hum him theih loh phah. Alcaraz leh Medvedev te hi vawi li an inhmachhawn tawh a, vawi hnih ve ve chakin, an inkarah chungnung zawk an awm lo mek. Anni pahnih hi zanin hian a vawi nga nan an inhmachhawn dawn a, an inhmachhawn tur hi an inkara chungnung zawk tihchianna tur a ni tel dawn bawk. Tarlan tawh angin Russian Medvedev hi semi-final lut chiang tawh a ni a, group champion ni chunga semi-final lut turin Alcaraz lakah chak a tum ngei dawn. Medvedev a hmachhawn tur hi Alcaraz tan fiahna hautak a tling dawn a, a chak zo lo a nih chuan semi-final a lut zo lo ang a, World No. 1 ni mek Novak Djokovic nen an inkar tih zim a tumna a puitlin thei lo bawk ang.
Red Group-a an khelh hmasak berah Daniil Medvedev hian a hnampui Andrey Rublev chu set hloh lovin a hneh nghal a. Nilai zan khan Carlos Alcaraz hnehtu Alexander Zverev lakah set hloh lovin a chak zui leh a, khelh hnih a chak zawn vangin ATP Finals 2023-ah semi-final lut hmasa ber a ni.
An khelh hmasaka hnehna chang ve ve Medvedev leh Zverev te hi set khatnaah an inhnehtawk viau a, tie-break khelh a ngai nghal pang. Tie-break hmuhnawm takah vawi khat champion tawh Medvedev chuan vawi hnih champion tawh Alexander Zverev lakah harsa takin set khatna a la.
Set hnihnaah an inhnehtawk zui leh viau a, inkhel hmuhnawm tak daidantu chu break neih leh neih loh a ni. Chak tuma an inawr tawn zak zak hnuin Medvedev-a’n break pawimawh tak a nei a, game li hloh chunga set la zui leh in, 7-6 (9-7), 6-4 a hnehna changin, semi-final a lut zui ta a ni.
Medvedev lakah chak zo lo mah se Zverev hian tla chiang tawh Andrey Rublev a hmachhawn zui leh dawn a, semi-final luh theihna hun tha a la nei.
Alcaraz a chak, Medvedev a tlang
