Grand slam tournament pali tih loha tennis tournament lian zinga mi Indian Wells Tennis Garden-a khelh mek BNP Paribas Open-ah he thu buatsaih lai hian defending champion Carlos Alcaraz chuan fourth round a lut fel tawh a, chu hmun thleng tur chuan third round inkhel pakhatah 6-2 6-3-in Felix Auger-Aliassime a hneh a, round of 16-a Fabian Marozsan a hmachhawn result erawh tarlan hman a ni lo.
Spaniard Alcaraz hi thla hmasa khan kheimit na avangin Rio Open-ah a inhnukdawk a, Indian Welss lama a title kawl lai humhim a duh vangin a indim deuha ngaih a ni.
BNP Paribas Open women’s draw-ah world number one Iga Swiatek pawh round of 32 paltlang tawh zingah telin, Czech Linda Noskova lakah 6-4 6-0 hnehna a chang a, Russian-born Kazakhstani player Yulia Antonovna Putintseva nena round of 16 match an khel result tarlan hman a ni ta bik lo.
Indian Wells-a inlan langsar dang Britain chhuanvawr Emma Raducanu chu nimin khan round of 32-ah tlawmin, Belarusian world number two Aryna Sabalenka chuan 6-3 7-5-in a hnawtchhuak.
Kum 2021-a US Open title a rawn lak nawlh hnu khan Raducanu hian a career ranking-a a tawnsan ber thlengin world number 10-na a han hawlh pha a; kha mi hnu khan tournament liana champion a harsat ta zel a, nikuma fourth round a thlenna California tournament-ah pawh hian thui a thleng zo leh ta chuang lo a ni.
Kum 21 mi Raducanu hi nikum khan hliamin a tibuai nasa hle a, world ranking-ah pawh 250-na daih ni tawhin, US lama tournament lianah pawh hian wildcard hmangin a inlan thei hram a ni.
Indian Wells second round-a a chak chhan pawh kha damlohna avanga a tumpui Dayana Yastremska inhnuhdawh vang a ni a, third round-ah grand slam title pahnih la tawh leh second seed luahtu ni bawk Sabalenka a ngam ta lo a ni.
Mipa singles round of 32 inkhel pakhatah third seed Jannik Sinner chuan 6-3 6-4-a Jan-Lennard Struff hnehin, vawin round of 16 inkhel pakhatah tualchhung player Benjamin Todd Shelton a hmachhawn leh ang.
11th seed Stefanos Tsitsipas pawhin round of 32 inkhel dangah tualchhung beiseina Frances Tiafoe lakah 6-3 6-3 hnehna a chang a, last 16 lama Jiri Lehecka nena an inkhel dinhmun tarlan hman a ni ta bik lo.
Mipa singles inkhel dangah British number one Cameron Norrie pawh third round paltlang lo langsar zingah telin, Frenchman Gael Monfils nen hun rei tak an inchai hnuah he hmuna champion hlui kum 28 mi Norrie lakah Monfils chuan 6-7 (5-7) 7-6 (7-5) 6-3 hnehna a chang ta zawk a ni.
Kum 37-a upa Monfils hian vawili a hmachhawn tawhah Norrie hi a la hneh fai vek a; quarter-final luh inchuh match pakhatah vawiin hian Norwegian ninth seed Casper Ruud a tum dawn a, a chipui French rawlthar Arthur Fils hnehtu Ruud lakah Monfils hian phuba a la zo dawn em hriat a ni rih lo.
Thawhtanni khan Danish seventh seed Holger Rune chuan Italian 26th seed Lorenzo Musetti laka 6-2 7-6 (7-5) hnehna changin, round of 16 inkhel pakhatah Taylor Fritz a tum leh ang.
Thawhtanni khan men’s world number one Novak Djokovic chuan round of 64-ah Aleksandar Vukic a hneh zet a, round of 32 lamah Italian kum 20 mi Luca Nardi chuan 6-4, 3-6, 6-3-in Serb superstar hi a hnawtchhuak zui ta mai a ni!
Alcaraz leh Swiatek an tlang
