All England title hawn zo leh lo Lakshya Sen
Pathianni final-ah Lakshya Sen chu 15-21, 20-22-in a tumpui Chinese Taipei star Lin Chun-Yi lakah a tlawm leh hlauh a, a tum hnihna atana All England Open badminton title a beiseina chu boruakah a thamral leh ta!
Prakash Padukone leh Pullela Gopichand-te hnu lamah Indian badminton player-te zinga All England champion an chhuah theih tawh reng reng loh laiin kum 2022 final-a lo tlawm tawh Almora khaw tlangval Sen-a hian a tum hnihna atan All England Open final a rawn lut chho leh nawlh a; final lut tura a kalkawng hnuhnung ber semi-final match-ah chak turin minute 97 zet khelmualah hun a hmang a, final-ah erawh minute 57 chhungin a tlawm fel hman!
Kum 25 chhung zet India-in All England Open badminton title a nghah hnuah pawh chhanna a la awm thei ta lo tluang zel a; Lin Chun-Yi kha Chinese Taipei player-te zinga All England men’s singles title la thei hmasaber a ni ve thung.
Kum 24-a upa Lakshya hma hian Indian shuttler dang pahnih Prakash Nath (1947) leh Saina Nehwal (2015)-te pawh final-a chak zo loin All England Open badminton runner-up an lo ni ve tawh a ni.
Tun thleng hian Padukone (1980) leh Gopichand (2001)-te chu Indian zinga he title ngaihhlut hlawh hawn thei awmchhun an la ni ta zel rih.
Lakshya hian final-a a tlawm hmain karliamta khan khawvela player tha ber ber pahnih world No. 1 Shi Yu Qi leh World No. 6 Li Shi Feng a hneh hnu marathon 97-minute semi-final match-a Canadian Victor Lai a paltlang leh hnu phei kha chuan champion tura rin a kai hman viau tawh a, mahse, a tum hnihna atan he tournament final-ah a chak lo zawk a ni leh ta a ni.
All England title hawn zo leh lo Lakshya Sen
