Ambani-a’n a sahuanah Escobar-a tuivawk enkawl inhuam

Indian billionaire pakhat fapa chuan Colombia-in kum tam tak chhung harsatna a lo tawh tawh, ruihhlo tawlhtu lar, Pablo Escobar-a tuivawk rual enkawl pui a inhuam.
Kum 1993-a police-ten an kah hlum, Escobar-a hian dan lovin rannung danglam tak tak a la lut a, chung zingah chuan tuivawk nu leh pa, ‘cocaine hippo’ tia an sawite pawh an tel.
An pung a, Colombia chuan kah chin telin thunun dan hrang hrang an lo enchhin tawh a, an hlawhtling theih lo va, 80 vel suat an tum mek.
Asia-a hausa ber, Mukesh Ambani-a fapa, Anant Ambani-a chuan Gujarat, India-a a mi mal Vantara sahuanah ‘daha enkawl a inhuam’ tih a sawi a. Colombia hian puih inhuamna a dawn chungchang hi engmah an la sawi lo.
Colombian environment minister hnena lehkha a thawnah Ambani-a zoo CEO chuan India-ah ran rual hi ‘dam chhung enkawl’ an inpeih thu a sawi.
Escobar-a hian tuivawkte hi a ranch, Bogotá hmarthlang lam km 250 vela hla, a nawmchenna hmun, Hacienda Nápoles-ah a dah a ni.
A thihsan hnuah tuivawk nupa hi zalen takin an vak a, Colombia-a lui lian ber, Magdalena kam velah an pung ta chiam a ni.
Hmalakna hrang hrangin an pung zel hi a dang thei lo va, anmahni eitu tur an awm lo va, Antioquia bial tuidul leh hnim hring chu African rannung awmna atana hmun tha tak a ni bawk.
Colombian environmentalist-te chuan Africa pawna ran rual lian ber nia rin tuivawkte hi ran dangte bei thin an nih avangin a awm sate an hnawt chhuak nasa niin an sawi a. Magdalena kama sangha mantute pawh khawmuala rannung lian ber zinga mi, a pa puitling chu ton thum zeta ni thei tuivawkte hian a tibuai hle bawk.
Vantara sahuanah hian sai, sakeibaknei leh rannung dang chi hrang hrang 2,000 vel an awm a. Jamnagar-a acre 3,500-a zau a ni a, khawvela tuialhthei thlitfimna hmun lian ber, Ambani-a ta tho avanga hla vak lo a ni.
Mi malin sahuan a nei hi wildlife activist leh conservationist-ten an sawisel thin a, a sik leh sa chu rannung thenkhat tan a tha lo niin an sawi thin.
Escobar-a kha Medellín cartel hotu a ni a, Miami leh US chhim lama ruihhlo tawlh rua hausa, $ tluklehdingawn 30 vel khawltu, ‘cocaine king’ tia vuah a ni.
Kum 10 chuang an pawl a hruai chhungin mi ruk bo, tualthahna za tam tak, thamna pek, bomb puak leh an pawl elpui ruihhlo tawlhtu dangte nena indonaah a inhnamhnawih nasa hle thin.