Congress party president Lal Thanzara;n AMC inthlan lo awm turah tisual lo turin Aizawl mipui a chah a, “Kan hma lawkah AMC kan inthlang dawn a, state election-ah kan tisual tawh a, AMC election-ah chuan tisual tawh lo turin Aizawl mipuite ka ngen che u a ni,” a ti.
“ZPM sorkar hian an intiamna ang, kan ti ang an tih te an ti lo fai vek a, kan lo tisual hle a ni. State sorkarah kan tifuh tawh lo a, Aizawl khawpui enkawl tur tal hi chu i ti fuh tawh ang u,” a ti bawk.
Zirtawpni khan Mizoram Pradesh Congress Committee chuan Bhavan-ah Friday Political Session a hmang a, he huna thusawitu, an party president chuan AMC inthlan lo awm tur chungchang sawiin, “AMC election-ah hian milar te, infiammi te kan thlan tlinin nge khawtlang, kohhran leh YMA-a inhmang leh local council-a tawnhriat nei tawhte Aizawl khawpui tan tha ang tih mipuite pawhin kan ngaihtuah a ngai a ni,” a ti.
“Khawtlang rorelna leh hmasawnna te, in leh lo ram harsatna te a awm changa thubuai rem leh rorel a, ngaihtuahna seng tur an ni a, hmel leh hmai tidanglam, milar leh infiammi te hian min ngaihtuahpui thei ang em tih kan ngaihtuah a ngai a ni. Keini Congress party chuan candidate atan khawtlang, kohhran leh YMA-a inhmang, local council member ni tawh leh ni mek, tawnhriat nei candidate kan zawng a, candidate atan kan hmang a ni,” tiin a chhunzawm a ni.
“AMC hi Congress chhulchhuak a ni, a hringtu lo ten hun rei tak an kaihhruai avangin Aizawl khawpui hi a nawm tur angin a nuam lo. A hringtute ngeiin kan enkawl a ngai tawh a. Aizawl khawpui nuam leh hmasawnna kan rawn chhawpchhuak dawn a, chumi atan chuan intihsual tawh loh nan leh a tlai hnua in inchhir tawh loh nan kan candidate te lo vote turin ka ngen a che u,” a ti bawk.
Congress an sorkar leh a nih chuan ration buhfai man leh tuialhthei man an ennawn dawn tih a sawi a, “2028 MLA inthlanah Congress kan tling a nih chuan ration buhfai man leh oil man hi kan ennawn dawn a, NLUP changtlung zawk kan kalpui leh dawn a ni. Chumi hmang chuan mi rethei te, khawpuia mi rethei te, thalaite an dinhmun kan siamthatsak leh dawn a ni. Tuna Bana kaih chang lo leh Chief Minister Special Package dawng lo zawng zawng te pawh NLUP hmangin an ban kan kaihsak dawn a, NLUP-ah chuan inthliarna a awm ve lo ang,” a ti.
“Nimin maia Zemabawk High School Veng Local Council election-ah khan ruling MLA leh minister te’n a tiam theih ang ang an tiam a, nasa takin sum leh pai nen hma an la chunga Congress candidate pakhat kan thlang tling hi a lawmawm kan ti a, MLA 10 nei pawh an ‘nil’ a ni a, Congress hian hma kan sawn zel a ni,” a ti bawk.
An party thuchhuaha a lan danin, MNF atangin mi 17 leh neutral mi 33 te Congress party-ah hemi ni hian an lawmlut a ni.
AMC-ah tisual tawh lo turin mipui ngen
