Aizawl Municipal Corporation chuan kum 2026-2027 chhung an budget tur cheng nuai 12754.93 an pawm a, an budget-ah hian nuai 10087.62 (79.09%) chu hmasawnna hnathawhna tur (capital expenditure) a ni. Executive corporator (Cash & Accounts) Christina Roluahpuii Sailo chuan an manifesto milin budget an ruahman tih a sawi.
Board of Corporator thutkhawm June 25-a pharh tak AMC budget estimate 2026- 2027 chu Thawhtanni khan sawiho a nih hnuah pawm a ni a. Christina Roluahpuii Sailo chuan budget an pawm hnuah thuthar thehdarhtute kawmin, budget chu inthlan dawna an manifesto mila duan a ni tih a sawi. “Kan manifesto vawi leh khatah tih hlawhtlin vek theih ni lo mah se, kan manifesto kan ngaipawimawh hle a, chumi mil chuan budget kan duang. Kan manifesto angin hma kan la zel ang,” a ti.
AMC sawrkar tharin thla khat vel leka budget an pharh thei chu lawmawm a tih thu sawiin, an budget estimate chu cheng nuai 12754.93 a ni a, nikum (2025- 2026) budget estimate nuai 11217.89 aiin nuai 1537.04 in a tam zawk tih a sawi. AMC chuan mipui tan theihtawp an chhuah zel dawn tih a sawi a ni.
An budget a pun chhan ber chu, 15th Finance Commission urban local body grants an dawn tlai leh term hmasa lama hman bang leh an dawn hman loh cheng nuai 5121.94 a awm vang a ni tih executive corporator hian a sawi a. Hengte hi a bo a bang awm loin kumin budget-ah dah leh vek a ni. State sawrkar atanga grant -in-aid an dawn chu an budget atangin 20.86% a ni tih a sawi.
Christina Roluahpuii sawi danin, AMC chuan kum 2026- 2027 chhung hian anmahni thawh chhuah atangin nuai 1231.70 hmuh an inbeisei a ni. State sawrkarin grant -in-aid atanga AMC a pek tura a ruahman chu nuai 2661.12 niin, heta tang hian nuai 2128.89 (80%) chu AMC chan tur niin, nuai 532.22 (20%) chu local council-te chan tur a ni.
16th Finance Commission atanga urbal local body grants an dawn tura ruahman chu nuai 3740.17 a ni a, heng zinga nuai 1870.09 (50%) chu a hmanna tur bik ruahman lawk loh (untied fund) niin, nuai 1870.09 (50%) chu a hmanna tur ruahman sa (tied fund) a ni.
Kum 2026- 2027 budget pumpui atang hian thawktute hlawh leh inrelbawlna (revenue expenditure) chu nuai 2667.32 (20.91%) niin, capital expenditure nuai 10087.62 (79.09%) a ni. Aizawl mipuiin awlsam zawka AMC an dawr theihna atan thiamna changkang zawk tihchangtlun lehzual tum a nih bakah online service tihbelh zel tum a ni.
AMC sawrkar thar chuan mipui hmasawnna leh awlsam zawkna atan kawng hrang hrangah Study Team an din tih executive corporator hian sawiin, “Tun aia nasa zawka hma kan sawn theihna atan Study Team hmalakna hian rah tha a chhuah ngei ka beisei,” a ti a. An hnathawhna leh chetvelna tura ruahmanna an siam hrang hrangah theihtawp chhuahpuiah Aizawl mipui a sawm tih a sawi a ni.
8 AMC sum hmanna tur zinga 79.09% chu mipui kaihhnawih leh hmasawnna ruhrel dinna atana hman tum a ni.
8 Aizawl mipuiin awlsam zawka AMC an dawr theihnan tunlai thiamna changkang zawk (software) siam belh a, a awmsa tihchangtlunnan sum dah a ni.
8 Aizawl khawpui chhunga leimin laka invenna tur tuiluankawr siamna atan nuai 296.44 dah a ni a; Khatla-a pedestrian over bridge siamna tur sum dah a ni.
8 Local council-te hnenah vengchhung hmasawnna atan nuai 441 pek an ni dawn a; Corporator Ward Development Fund atana nuai 1120 dah a ni bawk.
AMC budget-a zaa 79.09 hma- sawnna hnathawhna atan dah
