Tuikual lui behchhana septic tank soak pit siam loa tuichhia luantirtu chu Aizawl Municipal Corporation chuan hremin, pawisa chawi tura a tih bakah soak pit tha tak siam turin a ti. Local council tin chu septic tank soak pit nei lo leh nei tha lo hriattir turin a ti bawk.
Aizawl Municipal commissioner Er Lalhriatpuia sawi danin, Tuikual luia septic tank thli luan luhtir an awm tih an hria a, kumin April 30 khan a hmunah an enfiah. Ebenezer Hospital bul Tuikual lui lei bulah Zonunmawia, Dinthar chuan Assam type building a sa a. Chhawng thum niin, home stay leh dawr atan hman a ni. Zonunmawia hian readymade plastic septic tank a hmang a, soakpit siam loin tui bawlhhlawh (black water) lo chhuak chu Tuikual luiah a luanluh tir a ni.
Mipui sawiselna avangin tui bawlhhlawh luanluhna bawm (soakpit ni lo) te tak te a siam leh nia hriat a ni a. Bawm atanga tui luanchhuahna kua pathum atangin tui bawlhhlawh chu a ngai ngaiin a rawn luang chhuak leh nghal thin tih hriat a ni tih a sawi bawk.
AMC chuan Zonunmawia hi pawisa chawi tur leh soak pit tha tak siam a, Tuikual lui tibawlhhlawh tawh lo turin thu a pe tih a sawi a. April 23 khan AMC hian order chhuahin, local council-te chu an huamchhunga septic tank soak pit nei lo emaw nei tha lo emaw chu ni 30 chhungin report pe turin a hriattir zui a ni.
Aizawl khawpuia chengte hriselna atan vawk vulh khuahkhirhna AMC-in a kalpuinaah mihring tana him lohna hmuna vawk vulh khapin, dan zawmlote chungah hremna lekkawh turin hma a la tih commissioner hian a sawi a. Chutihlaiin ngaihnathiamna angin vawk vulh chhunzawm dilna 8731 dawngin, heng dilna hi AMC leh local council-ten a hmunah an endik mek a, local council 85 zinga 75 endik tawh a ni. Endik hna hi vawk hri (African Swine Fever) leng vangin chawlh lailawk rih a ni.
Aizawl mipuiin sa thianghlim zawk an ei theihnan leh thianghlimna kawnga ke pen zel turin AMC chuan ran talhna hmun, Slaughter House mumal tak nei turin ruhmanna a siam a, tunah hian hmun 12-ah siam tan a ni tawh tih a sawi bawk.
AMC-in soak pit siam lotu hrem Soak pit nei tha lo enfiah turin ti
