AMC inthlan result kha ZPM tan inchhuanna tur chi a ni lo – K Hrahmo, MLA

AMC inthlan result kha ZPM
tan inchhuanna tur chi a ni lo
– K Hrahmo, MLA
AMC inthlan result chu ZPM tan lawmawm angin lang mah se, an tan inchhuanna tur chi a ni lo tih BJP MLA K Hrahmo chuan a sawi.
Thawhtannia an party office-a inkhawmah BJP State Core Group member K Hrahmo chuan, AMC inthlan result kha ZPM tan lawmawm angin lang mah se, an beisei a pha lo tih a sawi.
“Aizawl khawpuiah MLA an nei vek a, ninister an nei fur a, chuti chunga an solid thei lo kha a zahthlak hle. Inchhuanna tur chi a ni loa, an MLA neihna bial vekah AMC seat hnih an chan,” a ti.
Hei mai ni loin, a hun takah inthlan an ngam lo tih sawiin, “Artelukawn an hlau a, VC/LC inthlan kha sawhthing lei hmain an sawn hma a, AMC inthlan erawh kawng siam hnu ah an sawn thung. An kawng siamna pawh mipui sum a la ni lehnghal a, thawhchhuah an neih loh vangin mipui min rawk hle. Chumai ni loin, AMC-ah vote 66.77% a tla a, Aizawl mipuiin ZPM sawrkarah beisei an nei tawh loh avangin vote pawh an thlak tha peih lo hial a ni,” a ti.
2023 MLA inthlan hmachhawn lai khan, Mizoram mipui leh kohhran thlenga thusawi thinten AAP that thu leh corruption-a an fihlim thu, mipui tana an thil tih that an sawi a, pulpit-ah meuh an auchhuahpui niin BJP MLA hian a sawi. Chutih mek laiin, an ngaihsan em em AAP MP 10 zinga 7 chuan BJP tha an ti a, an lo ngaisang hle zawk a, BJP ah an lut ta hial tih a sawi a ni.
“Thil tak tak Mizoram hian kan ngaihtuah a hun ta. Modi kaihhruai sawrkar laipui hi khawvel thila kan mamawh chhanna a ni tih hria a, support kan pek a hun tawh. State hrang hrang inthlanah BJP chuan chakna sang tak an nei leh ta te hian Modi sawrkarah rinna an nghah zia a lantir zel a ni,” K Hrahmo hian a ti.