AMC INTHLANAH PARTY POLITICS KAN MAMAWH KHER EM?

Rev. Dr. Zaichhâwna Hlâwndo
Kum 2026 kum thar kan chuang kai chauh tihin kan ram khawpui Aizawl chu party politics boruak chhiain min tuam leh nghâl a. Party worker te chuan an party tana AMC candidate tur, mipuiin an duh ngêi tur mi lâr leh hmingtha an zawng a. Social media hmang tangkaiin an thlalâk te pho chhuakin AMC a lalna leh thuneihna chan ngéi tumin an phu leh ta suau suau mai.
Aizawl Municipal Corporation inthlan hun tur hi la chiang lo mah se, kumin 2026 April emaw May thla vela neih rin a ni. Kan hriat angin AMC hna ber chu Aizawl khawpui chhung enkawl a ni. Kum 2010 atang khan AMC hi din tan niin ward 19 awmin ward tin atangin member pakhat zel thlan an ni a, chung thlan chhuahte chu Mizoram State Governor-in a nemnghet thin. AMC hi Mayor, Deputy Mayor leh Commissioner te kaihhruaina hnuaiah kalpui a ni. Member hmun thuma thena hmun khat hi hmeichhe tâna ruat bîk a ni. AMC huam chhûngah hian local council 83 an awm .
Kan ram rorêl dan her sual laklawh tawh avang hian engkim mai hi inchuh (politicalize) tur emaw kan ti ta a ni ber mai. Kan nula leh tlangval fel tak tak, party politics tuinu a luh duh rêng rêng lote pawh chu an hmingthatna leh felna kha party kawr haktir nan hmangin BJP, Congress, MNF, PC leh ZPM party mi leh saten party kawr hâk tirin party politics nula leh tlangvalah kan chantir a. Party politics indona huang chhungah kan hnûk lût a, lal leh thuneih inchuh nan kan hmang ta zêl mai chu a ni. Party politics khelh nân Kohhran lama rawngbâwlnaa mi tangkai leh fel, mipuiin an duh tur kan zawng a. Rawngbawltu fel leh tangkâi tak takte pawh chu party politics = thattheihmiahlohna bawm chhungah chuan kan khung lût zêl a. Party politics tuinû leh bawlhhlawh chuan a lo chiah bâl zêl chu a ni ber mai.
Pathianin mihring a siam danah mawhphurhna sáng tak a pe a. Thilsiam zawng zawngte enkawl tur leh ama duh dân leh a thu ang zêla rorêlna fel tak kengkawh turin a ruat a ni. Mahse mihring hmasa Adama leh Evi ten Pathian thuthlung an bawhchhia a, ei loh tur Eden huan lai taka thing rah an ei a nih kha. Chu thuthlung bawhchhiatna atang chuan mihringte hian Pathian thu leh a duh dân aiin setana duh dânin rorêlna pawh kan kalpui duh ta zêl a ni. Ringtu thenkhat phei chuan khawvel rorélna hi setana tâ tur rêng emaw an ti hial tawh a ni.
Kan ram kohhran pawl hrang hrang rorêlna kan siam dânah Kohhranin rorêlna tha zawk, Pathian duh dan nia kan hriat angin kan kalpui a. Inthlanna felfâi tak neiin rorêlna chelhtu turte kan thlang tlangpui. Mawhphurhna chelhtu tur pawh inchuh buai awm lovin tha takin kan insiam rem mai thin. Tuna kan rama kohhran pawl hrang hrangin rorêlna kan kalpui dan hi ‘Democratic Theocracy’ tiin ka vuah a, chu chu ‘Pathian lalna tura mipui thlante rorêlna’ tihna a ni. Hetiang ang hian kan ram rorêlna hi siam a, kalpui ni se tun ang êm êma party politics hmanga rorêlna tha lo hi chu kan pumpelh theih ka beisei.
AMC inthlanah te pawh hian party politics tel miah lovin, party sawrkar siam kher lo hian a kalpui theih a. Inthlan kher kha sawrkar dan dinglai a nih a, a tul a nih pawhin he hna atâna mi tling leh tangkâi tur a duh apiang kha rawn in-candidate mai se. Mipuiin kan duh duh kha lo vote mai ila, party politics kawr hâktir emaw chumi party candidate chu a ni ti kher lo khan. Chung kan thlan tlinte chuan mawhphurhna an chelh dan tur pawh chu anmahniin thlangin inruat ve leh mai se, Party sawrkâr emaw party politics tuinu awm lovin rorêlna felfai leh lungrualna tha tak a ni zawk dawn lawm ni? Tuna kan kalpui danah chuan an duh emaw duh lo emaw party kawr inbeltirin party politics indona field-ah loh theih lovin kan luhtir zêl a. AMC pawh tuemaw party ta bik turin kan siam zêl chu a nih hi.
Bible-ah Zawlnei Amosa hmanga Lalpan a lo puan, “Rorêlna dik chu lui angin luang zawk sela, Dikna pawh luipui kang ngai lo angin luang rawh se” a tih thlen hun tur hi dingdihlipin kan thlir a. Zofate Kristian ram leh Kristian hnam inti ngat ngamte ramah chuan chu chu a taka ding thei tur chu a ni ang. A taka a din theih si loh chuan kan Pathian thu kha a takin kan chantir thei dawn lo tihna a ni. Rorêlna dik leh tha kan neih theihna tur chuan politics thianghlim leh tha kan neih phawt a ngâi. Chu politics thianghlim nei tur chuan tuna kan party politics system tha lo hi thiah a, Pathian duh dan ang taka rorêlna, Pathian Lal Ram Sawrkâr (PLRS) kan din a ngai. PLRS a din thuai theih nan kan rilru ti thianghlim ila, party politics ruihchilhna sal tânna atang hian inthiar fihlim ila, kan ram kan hnam min hruai turin Lal Isua Krista chauh thlang thei tura kan ibuatsaih a hun tak meuh a ni.