Tuikual South huam chhungah cheng vaibelchhe 10.59 (Nuai 1059) senga sak AMC Multi Complex changtlung tak hman theih tura tunhnaia hawn a ni ta hi a lawmawm hle a. Hei hi khawpui enkawltu AMC-in hmasawnna rotling (asset) a siam zinga chhuanawm ber pawl a ni awm e.
He hmasawnna hna thawh nan hian a project cost atanga 27.95% (nuai 296) chu AMRUT (Atal Mission for Rejuvenation and Urban Transformation) Fund hman niin, a bak 72.05% (cheng nuai 763) zet chu AMC hnuaia mipui chhiah pek tlingkhawm atanga hman a ni. Hei hi, mipui chhiah pek tlingkhawmin hna a thawh theihzia entirna pakhat a ni. He Multi Complex hian sum a thawk chhuak reng tawh dawn a, chu chu tax peipunna (investment) tha tak a lo ni zel dawn tihna a ni a, chu chuan khawpui hmasawnna tur thil tam tak a thawk kaw chho zel thei dawn a, tax pekin lukhawng a neihzia lanna te pawh a ni zel ang chu.
Hetih rual hian, a tangkaina leh a hlutna chhawr tangkaitu tur lam hi ngun taka ngaihtuah a pawimawh awm e. Kan hmuh leh hriat angin, khawpui chhung hmelhmang titawptu leh timawi lotu pakhat chu, kawng sira thil zuar tam ta lutuk hi a ni. Hei hi AMC leh UD&PA department tangkawp chuan felfai zawka kalpui tumin hma an la mek a. Tuna AMC Complex hi hetiang atana chhawr tangkai theih tur a nih a rinawm a. Building chhawng 7-ah chuan kawng sira inzuar tam tak hi a seng luh theih ngeiin a rinawm.
Heng zingah hian, tuna Legislative Assembly nena insi renga bazar awm mek hi, assembly building zahawmna tibawrhbangtu a nih piah lamah, security atan pawha tha lo tak a nih avangin, AMC Complex-a suan luh hi tihmakmawh a ni a, chu chu thuneitute pawhin an tinzawn a ni pakhat bawk awm e. Hetih lai hian, he complex-a seat awmte hi tender tura tih niawma sawi rik te a awm leh ta zel a, assembly kianga inzuarte hi chu seat neisa an nih avangin he Complex-ah hian insuan lut nghal mai thei tura ngaih an ni a, chuti a nih chuan, assembly house pawh security thilah a him phah sauh ang a, AMC Complex hian kawng hrang hrangin hmasawnna a thlen dawn tihna a ni ber a, a lawmawm hle a ni.
AMC Multi Complex hi…
