AMC Sports Complex tihchangtlunna
sum thawhtu turten a hmunah enfiah
Bawngkawn AMC Sports Complex-a phullem phaha floodlight leh tul dang siamna atan sanction pe tura beisei, Ministry of Power hnuaia Power Finance Corporation (PFC) a CSR Programme enkawltute chuan Zirtawpni zing khan a hmunah an enfiah.
Thudawn danin, PFC CSR Programme chief general manager Prabhakar Das leh manager Suresh Kumar Naidu chuan Bawngkawn AMC Sports Complex hmunhma hi an rawn endik a. He project atana detail project report chu an zirchiang tawh a, a takah a hmunhma rawn endik leh an ni tih an sawi. Aizawl Municipal Corporation leh Bawngkawn Local Council chuan he field tichangtlunga inenkawl tawm turin inremna thuthlung – MoU an ziak a. Sports Complex hi tha zawka siam a nih theihnan AMC leh North East Consultancy firm chuan kum 2025 khan inremna an lo ziak tawh tih sawi a ni.
Inremna ziahah NECS hian DPR siamin sum a zawng ang, tih a nih angin, ruahmanna siam a ni. Ruahman dan chuan, he field-ah hian phullem tha chi phah a ni anga, floodlight 1300 lux aia hniamlo dahin, a bul vel tihchangtlun bakah a hmunin a zawh dan azirin sports discipline dang tan infiamna hmun siam tel a ni ang, tih a nih thu thudawnna chuan a sawi a. A project cost hi nuai 1530 niin, appraisal tih hnuah sanction theiha recommend tawh a ni tih sawi a ni.
Power Finance Corporation lamin Bawngkawn AMC Sports Complex an endiknaah hian MLA Robert Romawia Royte, Aizawl deputy mayor hlui Lalringliana, AMC engineer, NECS hotute leh Bawngkawn Games & Sports Association aiawh an tel tih sawi a ni bawk.
PFC hotute hian Aizawl FC Complex Lungleng-a phullem phahna field siam zawh thar an tlawh nghal a. Tha taka sak zawh a nih avang leh PFC-in sanction a pek bak hna tam tak thawh belh a ni chu lawmawm an tih thu an sawi.
PFC hotute hian Mizoram larsap Gen VK Singh (Retd) chu Lok Bhavan-ah an tlawh a. Larsap hian Bawngkawna AMC Sports Complex chu a ngaihpawimawh thu lo hrilhin, Chakma Autonomous District Council huamchhunga school ho tihchangtlunna tur project thehluh chu rawn sanction rang turin a lo chah a ni.
AMC Sports Complex tihchangtlunna sum thawhtu turten a hmunah enfiah
