AMC Commissioner chuan Aizawl Municipal Corporation-a thawktute chu zu an in leh in loh endik turin Excise & Narcotic Department a ngen a. END lam hian endik hun tur sawi lawk lovin breath analyzer hmangin AMC thawktute hi office hour chhungin zu an in leh in loh an endik thin dawn a. Hei hi nimin lamah social media news-in a tarlang a ni.
Sawrkar office-a thawktute zingah zu in mi an awm tih chu tlang hriat a ni. Heng sawrkar hnathawk zu in thinte hian office hour ni lovah chuan zu an lo in a nih pawhin, an mimal thil a ni a, an hnain a khaihlak phah lem lo a nih chuan thuhran a ni. Mahse, office hour laia zu an in a nih erawh chuan dan kalh a nih avangin an chungah action lak theih a ni. Tuna AMC hotuten hetianga END lam an ngen chhan hi, office hour-ah zu in an awm thin nia ngaih theih a ni nghal a. A lo nih chiah loh pawhin, zu laka fihlim duh vang hrim hrim pawhin, ‘i endik thin ang u’ an lo ti satliah pawh a ni thei. Eng pawh ni se, office staff laka breath analyzer hman tum a ni hi a mualphohlak ta hrim hrim a ni.
Office hour-a zu in thin chuan a hna a thawk tha thei lo mai pawh ni lovin hna kal lai a tibuai zawk thei bawk; chuvangin zu laka fihlim chu a pawimawh hle a ni. Hetih rual hian, office hour chhunga office hna ni lo, thildang tih kan ching ta em em mai pawh hi strict taka kalpui ve theih ni se, hei pawh hi zu in avanga hnain a tawrh kan hlauh tluk bawka hlauhawm ve tho a ni. Sawrkar thar hian a tir lamah khan office hour vawn uluk an tum thu sawiin biometric attendance device te pawh hman a nih tur thu kha an sawi a. Secretariat chauh lovah pawh hei hi chu hman theih nise, breath analyzer hman a tul ang thova thil tul ni vein a lang tlat a ni.
AMC staff leh breath analyzer
