JC.Zoremi Hmar Joute
Kumtluana an ram pumin an buaipui US president inthlanpui chu kan vai liam ta a, kan hriat theuh angin US mipui maktaduai 240 chuan thawhlehni, November ni 5 khan an president tur thlangin vote an thlak a, niminah vote chhiar niin, USA president 47-na ni turin hneh takin Donald Trump chu thlan tlin a ni leh ta.
Inthlanpui boruak a sang hle tih kan hria a, court case te a awm a, election atanga candidate inhnukdawk te an awm bawk a, inhnialna. insawichiatna, inbeihna nasa tak nen; tin, nunna atana hlauhawm khawp dinhmun an nih hnuah inthlan ni chu an hmachhawn a, amaherawh chu US in inthlan an kalpui dan hi ram tam tak democracy kalphung nen a danglam deuh a, direct-a mipui thlan tlin an nih loh avangin a kalphung hi zir chian tham a awm a ni.
United state inthlanah hian popular vote, mipuiin an duh ber an vote avangin president hi an thlang tling nghal mai thei lo va, electoral college a awm a, residential candidate-te hian an pal tlang phawt a ngai a ni. US-a state tin hian electoral vote nei zat an nei a, chu chu state population azira chhut niin, state-a hnehna chang hi electoral vote-ah a chak nghal tihna a ni. Tin, electoral college tih hi hriat chian a ngai a, electoral college-a vote nei zat delegates hi 538 an ni a, candidate hian delegates 270 tal thlang tling turin an mamawh a ni. Heng delegates thlan chhuahte hi state hrang hrang 50 aiawh senator leh representative-te an ni.
Pathian ringtu tha tak, zahpui lova tan tlattu leh a nun kaihruaitu chu Pathian ngei a nih thu tlangaupuitu, America president thar ni leh ta Donald Trump hi kristiante tan chuan tan loh har tak a ni a, khawvel puma kristiante chuan kan tawngtaipui mur mur mai a nih kha. Trump-a hi tling lo ta se America ram khu setana’n a duh duha a phin kual tur, neih inang inkawp rem tihna te, mawngkawhurte zalenna ram leh awlsam taka mipa hmeichhiaah leh, hmeichhia mipaa inthlak danglamna te, nau tihtlak (Abortion) phalraina te a hluar em em dawn; leh lamah erawh chuan conservative pachal, Donald Trump a tling a nih chuan, America ram khuan an lo tluksan Pathian lam hawiin democrat ho sawp chhiat tawh ram tun din lehna te, an ram leilung hausakna hai chhuah kawngah nasa takin hma a la leh ang a, America khu ‘Ram ropui’-ah a siam leh dawn a ni tih hi an au hla pawimawh zingah a tel a, Trump a tling ta a, a sawi anga awm thin a nih avangin an au hla tam tak hi an hlen chhuak ngeiin a rinawm a ni.
Inthlan boruak nena inhmeh riau thu dang i’n bih kual teh ang aw.
MARTIAL LAW: ‘Martial Law’ an tih hi hrilfiah dan a danglam thei hle ang. ‘Ram pakhat tualchhung inrelbawl dan buaichuar lutuk vanga sipai ten tharum hmanga mipui an thununna a ni e’ ti ta ila a dik ve thei tho ang chu.
EMERGENCY: Khawi ramah pawh buaina khirhkhan bik leh mipui thunun nana siam dânin awmzia a nei thei dawn lo nia an hriatin emaw, chhiatna nasa lutuk tlâng kàng, lirnghing leh tuilian nasa lutuk avanga dân phuah chawp, khauh bik hman a tul hunah te ‘Emergency’ an puang thin bawk a. Hêng tlachawp dân te hi nunphung alo pangngai leh hunah hlih a ni leh mai thin. Martial Law pawh hi hun reilo te atana hman tura ngaih a ni tlangpui.
CIVIL WAR : Civil war pawh hi hrilh fiah dan a danglam leh thei viau tho ang. Sawrkar hrang leh sawrkar hrang ni lo, sawrkar pakhat chhunga thuneihna inchuh vang leh, hnam hrang leh hnam hrang kara buaina emaw, ram khat chhunga chibil hnam bil tana ram inchuh vang te, sakhuana thila intihthiam lohna vang a, tualchhung indona lo thleng thin hi ‘Civil war’ an tih chu a ni ber awm e.
Kum zabi 19 atanga tunkum 2000 ( Ad 1800-2000) thleng hian khawvel sorkar hrang hrangah ‘Martial Law’ an tih hi vawi 81 hman a lo ni tawh a, chung zinga vawi 74 chu sipai ten sawrkar ding lai an paithlakna a ni; hêng zinga 31 hi Africa khawmual hnam te zinga thleng niin, 21 hi, South leh Latin America-a thleng a ni ve thung. Asia-ah pawh vawi 17 lai a lo thleng ve tawh a, Europe-ah khuan vawi 9 a thleng tawh bawk. Ram pakhata Martial law an puan ngunna ber chu Bolivia leh Peru-ah niin, an ni hian vawi 9 ve ve an puang tawh a. A hun reichhung thu-ah chuan, Bolivia-ah kum 15, Argentina-ah kum 14 leh Thailand-ah kum 12 te an ni.
United Kingdom leh India-ah te hian ram pum huap ang chuan a la thleng lo hlauh mai. India Prime Minister, Indira Gandhi’n, 1975 Khan emergency chu a lo puang ve tawh a, America-ah khuan Civilian President Abraham Lincolna’n ram pum huapin 1863, khan Martial Law a lo puang ve tawh a, khatih lai khan America tualchhung politics thu inchuh lâr tak mai chu ‘Bâwih neih leh bàn thu’ a ni. Abraham Lincoln chuan bâwih neih chu Pathian thu lo lutuk nia hriain, chhuah vek an tul zia chu inthlanpui campaign au hla berah a nei a, thlan tlin a lo ni ta a. Bâwih zawng zawng bàntirna tur dân chu a siam ta ngei bawk a, bâwih (sal) neih chu America dânpui kalh a lo ni ta a, bâwih bàn thu chu a puang ta a ni.
Mahse, Chhim lam Sate 7 te chuan bâwih neih zel chu an la duh a, Independent an puang zui a. President atan Jefferson Davis an thlang ve nghal hmiah bawk a, ram pakhatin President 2 neih thu awm hek lo, thuneitu zawk nih inchuhin an indo ta chiam mai a, heng avang hian Abraham Lincoln chuan sipaiho hnenah thuneihna pumhlûm, Sorkar dodal zawnga mipui punkhawm khapna, a tul a nih chuan kah hlum hial pawh phalna dân chu a lo pe ta a ni. ‘Martial Law’ a nih chuan sorkar dân ding lai zawng zawng hlih vek a, hun eng emaw chen atan sipai rorelna hman a kâwk a, mahse he sipai rorelna denchhen hian Dictator nunrawng pui pui an lo chhuah phah fo bawk a ni.
Tin ram pum huap ni lo ram bial khat (state) huam chauh pawhin Martial Law hi puan a ni fo bawka, 1941 december ni 7 a, Japanese Imperial Navy ten, Pearl Harbour an rùn tum khan Hawaii thliarkar bikah Martial Law puan a lo ni tawh tih te pawh lo hre ve mai mai ila. Hetiang deuh hian, USA-ah bik phei chuan State tin Governor ten, State chhunga dan leh dûn ken kawh hleih theih loh khawpa harsatna a awm chuan, Martial Law an puang thei a ni.
1914 kum pawh khan Lungalhthei khur inchuhna avangin Colorado-ah buaina a chhuak chiam mai a. Hê state bikah hian Martial Law puan a lo ni tawh a, hetih hunlaia US President Woodrow Wilson chuan sipai te pawh a tir lût ve hial a ni. USA bikah khuan hetiang hian state bila Martial Law puan a tam tawh em em a, sawi vek sèn pawh a ni lo. Thlipui, ruahpui leh lirnghing nasa lutuk vanga mipui mimir nunphung thunun theih loh khawpa buai leh, tawrhna nasa tham a thlen chang pawhin an puang fo bawk.
Mipui helna alo chhuah hian Martial Law puan a ni thin bawk a, 1989 China rama thil thleng, Mipui nawrhna sorkar tan pawha hlauhawm tham, (Tiananmen Square protests of 1989) ah pawh khan China sorkar in Martial Law hi puang a ni. Mizoram buai 1966 khan ‘Arm force Special Power Act’(ka sawi dik em aw?) an tih chu Mizoram bikah hman a ni a, Martial Law dik tak a ni. India pawhin Mizoram bikah alo hmang tawh tihna a nih chu.
Tunah chuan America-ah mihring mtd 330 chuang an lo awm ta a, 1860 chho vel ai chuan an changkang tawh hle a, politics kalphung pawh a sang tawh em em a ni. America dintu ten mumang lamah pawh an mangphan phak loh tur chu, ni tin thil thleng leh kalphung pangngai ang lek a lo ni tawh a. Khawtlang nunah phei chuan, atir te-a America ram dintu te kha rawn tho leh chiah se la chuan, Sodom leh Gomorra ang chiahin, an rawn hmu tawh dawn a ni. Hei hi America chauh an ni lo, tunlai khawvel nunphung a ni tawh hrim hrim.
Mahse, America-ah khuan Kristian sakhua-a la kal fawr tak an la tam em em a, leh lamah mawngkawhur leh nawhchizawrhna pawh la zam mai mai thei, nawmsip bawl kawnga duham chin lem neilo leh sum leh pai ringawt ngaihtuah an tam tawh ropui si; khawvel taka Sorkar dân leh dûn thlâk danglam duh mai, thuneihna an chan dawn phawt chuan Setana duh dan pawh pawm zam thei mai zel leh, Kristian nun dan a theih chin chin a humhim hram hram duhtu ten President an innih chhawk chho ta zut mai a ni. Dik tak chuan tuna America ram politics thu inchuh khu, bâwih neih leh neih loh lam ni tawh lovin, direct taka Setana leh Pathian inbeihna a ni tawh chiang khawp mai; a chiang lutuk tlat!
2016 ah Inthlanpui an nei a, Kristian te tana beisei phak loh khawpa pa rorum leh tum ruh, pa sehhel leh sum leh pai îtna nei si lo, mi dik rumrut mai chu Donald Trump chu President atan thlan a ni ta a, kum 4 chhungin amah dodaltu ten, hna thawk hman lek lo turin an beihrawn zui a, mahse hna zawng a thawk ropui rem rem khawp mai, North Korea a thunun fel der a, ISIS hel a nuaibo hmiah a, Kristian tiduhdah em em tu, China a dodal ngam bawka, Amerika hmelma hlauhawm ber ni mêk Iran a vau zãm der bawk. America sumpai dinhmun a chawi kang dawrh bawka, khawvel ram hrang hranga Kristian tihduhdah tuartute thlavang a hauh nasa em em bawk a. Amah ertu te chuan America mipui ten a rûk taka an ngainat zia an hre ru kar mai si, a thil tihthat lam reng reng an sawi lang duh miah lo!
A chang leh, German dictator turu lutuk, Adolf Hitler nen an han tehkhin vei thùl. Ni e, ram hmangaih kawngah te, sum leh pai ûm loh thu-ah leh Mi huaisen, rorum, dik nia an hriatah chuan pawisak neih loh thu-ah leh mi tumruh leh luhlul an nih thu-ah chuan an inang ngawt mai. Mahse Juda te chunga an rilru put hmang leh nunrawn thu-ah chuan an inpersan ngang thung mai, Hitlera’n a tihduhdah em em Judate chu Donald Trump chuan mal a sawmin a vulh lian thúr thûr a, Hitlera’n a ngainat em em Muslim te erawh Donald Trump chuan a ngaina lo kher mai, a nunrawng ve miah bawk lo.
2020 kum tawp a lo her chhuak a, America Inthlanpui a lo hun leh ta. Amah ertuten kum li teh meuh tih chhiat tuma an beih hlawhchham hnuin, a hmâwr bâwkna ni awm takin American history-a inthlanpui buaichuar ber ni reng tawh tur chu a saptawng takin an rawn ‘apply’ ta a ni. An vote thlâk dan leh chhiar dan dikloh nasat dan zia leh vàn sànzia te chu zêp eng ang mah se, he luikam atang pawh hian a lo hriat chian theih kher mai. Khatia thâwk leh khata lehthaltir thut lo khan, atir tê atangin vote ru keuh keuh zâwk se la chuan rinhlelh an kâi lo deuh mahna le.