Sawrkar laipui ruahman AMRUT 2.0 leh hmun dang atangin Mizoram sawrkar chuan district khawpui hrang hrangin tui thianghlim an lakna tur a siam tharin a awmsa a tichangtlung mek bawk.
Cheng nuai 997.78 sengin Greater Lunglei Water Supply Scheme tihchangtlun hna thawh mek a ni a, he hna chhunga Tlawng lui tuikhuah siam mek chu kumin March hian zawh hman beisei a ni. Lungleiin tui hnianghnar a hmuhna tura SASCI hnuaia cheng vaibelchhe 55.70 senga Greater Lunglei WSS tihchangtlun hna thawh mek pawh zaa 45 zawh a ni tawh.
AMRUT 2.0 hnuaiah hian Greater Hnahthial WSS thawh mek a ni a, zaa 82 zawh tawh niin, he scheme kaltlang hian ITC Tlangah leh Rallang Tlangah tui dahkhawlna litre nuai 5 dawng thei tur pakhat ve ve dah a ni. Tun dinhmunah Hnahthial khaw chhungah tui connection nei chhungkua 1957 an awm a. Tui hi 70 LPCD (litre per capita per day) a pek chhuah thin niin, Mizoram district headquarters-ah chuan tui sem thatna ber niin an inchhal a ni.
Mamitah chuan khawpui tui lakna pumpline chhe zual, km.2 a thui thlakna tur AMRUT 2.0 hna hi zaa 75 thawh zawh tawh a ni a. NESIDS hnuaiah Augmentation of Greater Mamit Water Supply Scheme Part-II (Clear Water and Distribution System) cheng vaibelchhe 40 man zaa 90 zawh tawh niin, kumin March hian trial run neih hman tum a ni.
Champhai district chuan AMRUT 2.0 hmang hian Greater Champhai Water Supply Scheme a tichangtlung mek a, hna zaa 61.14 zawh a ni tawh. Farkawn tui lakna tur siam zawh tawh niin, Ruantlang tui lakna tur hna zaa 80.51 an zo tawh.
Kolasib district-ah chuan town pali – Kolasib, Kawnpui, Bairabi leh Vairengte ah distribution line zawm belh leh tuizem leh reservoir siam tharna atan hman a ni a. Jal Jeevan Mission hnuaiah khaw 48-ah tui connection pek ni tawhin, chenna in 9038 a huam a ni.
AMRUT 2.0 hnuaiah Siaha khawpui tui lakna tih changtlunna atan cheng vaibelchhe 6.14 man project thawh mek a ni a, hna zaa 85 zawh tawh niin, a vaia zawh a nih hun chuan tuiah an hnianghnar lehzual dawn tih sawi a ni.
Serchhip-ah pawh Greater Serchhip Water Supply Scheme leh Thenzawl Water Supply Scheme tihchangtlunna atan hman a ni.
AMRUT 2.0 hnuaiah district khawpui tui lakna siamtha mek
