Ukrainian President Volodymyr Zelensky-a chuan a European thawhpuite lak atangin Russia-in a beih leh palh a thlena an ram himna ang tawk a la hmu lo tih a sawi.
“Kan thawhpui zawng zawngte hnenah hei hi ka zawh a ni a, chhanna chiang, innghah ngamna kan la dawng lo,” tiin Nilainia thuthar lakhawmtute a kawmnaah a sawi.
Hetianga president-in a sawi hma ni chiah hian UK leh France chuan indona titawp tura rawtna Russia-in a pawm huna Ukraine-a sipai danna tura inrem siamna an ziak.
Hetih rual hian himna pek tur tak tak erawh pawm a la ni lo va. Indo tihtawp tuma bei nasa ber, US pawhin Thawhlehnia Paris-a inbiaknaah eng intiamna mah a la nei lo.
Ram 30 vel telna, Coalition of the Willing tia an sawite Paris-a an inbiak zawh khan UK Prime Minister Sir Keir Starmer chuan UK leh France chuan nakin zela inrûnna awm thei dang kir turin ‘Ukraine pumah sipai dah’ an tum thu a sawi a, French President Emmanuel Macron-a pawhin sipai sang tel an dah tur thu a sawi bawk.
Tangrualte hian US-in inremna kalpui chu a vil dawn niin an sawi a; mahse, Ukraine-in inremna a awm theih nana Russia hnena ram a pek tur chungchang erawh an la sawiho tel lo.
Moscow chuan French khawpuia inbiaknaa thutlukna siam chungchang hi engmah sawi a la nei lo.
Russian President Vladimir Putin-a chuan Ukraine hi February, 2022 atang khan rûn tanin tun thlengin Moscow hian Ukraine ram 20% chuang a thunun tawh.
Sir Keir-a chuan thuchhuah intawm an siam chu ‘hun rei tak daih tura Ukraine tana kan intiamna bung pawimawh tak a ni’ tih a sawi.
“Ukrainian leilunga van sang leh tuipui vawng him turin British, French leh kan thawhpui dang sipaite an awm theihna tur kawng a ni a, Ukraine-a sipaite nakin zelah a tichak dawn a ni,” a ti bawk.
Zelensky-a pawhin he inremna ziah hi fakin ‘rahbi pawimawh tak a ni’ tih a sawi.
A tukah erawh a thawhpui European ramten an ram an veng himna thei dawn em tih a ngaihdan an zawhna a chhannaah, “Himna tak tak kan la hmu lo va. Dan ang tak, United States Congress pawhin a pawmpui kha a la awm lo. An rawn ti a nih pawhin kan chaknaah kan la innghah zel a ngai dawn a ni,” a ti.
Paris inbiaknaah hian US President Donald Trump-a palai pahnih, Steve Witkoff leh Jared Kushner pawh an tel a. Witkoff-a chuan tangrual hian himna atana tih tur chu ‘an zo thawthawng tawh’ tih a sawi.
Kar hmasa khan Zelensky-a pawhin muanna atana inremna chu ‘90% peih tawh’ tiin a sawi ve bawk.
Ram inpek leh himna inpek chu palai hna thawktuten an la chin fel theih loh a ni a. Putin-a chuan Ukrainian sipai zawng zawng Ukraine khawchhaka Donbas atanga inhnukdawk turin a duh a, a nih loh chuan Russia-in a la dawn tih a sawi a, hei hi lehlamin pawm an harsat ber lai a ni.
Zelensky-a chuan ram hlan a duh bik lo va, sipai lak chhuah erawh a hnial lo va; mahse, Russia pawhin an lak chhuah ve a phut thung.
Moscow hian Donetsk region 75% chuang thununin a thenawm, Luhansk 99% a thunun bawk a. Region pahnih hi Donbas region an tih chu a ni.
An himna tura intiamna la hmu lovah Zelensky inngai
