An home race-a McLaren driver pahnih
inbeihnaah Norris dingchang
Pathianni khan Austrian Grand Prix-ah McLaren driver pahnih Lando Norris leh Oscar Piastri-te’n chungnung zawk nih tumin tlankawngah inbeihna hautak leh hmuhnawm an entir a, a tawpa dingchang ta zawk Briton Norris chuan pole position changtu a nih hlawkpuiin kumin chhunga a vawi thumna’n race hnehna a chang a, dirver standing lamah tun season-a vawi nga chak tling tawh chunga hmahruaitu ni mek Australian Piastri nena an inkar chu point 15-ah a pawthnai.
Australia leh Monaco lama lo chak tawh Lando Norris hian Austrian Grand Prix-ah khan a McLaren team-mate Oscar Piastri lakah khan nawrna khirhkhan a tawk kawng tluan a tih theih a, McLaren one-two kan hmuh leh nen tun season race zet chu British team hian an awpbet hneh kher mai a, kartawpah British Grand Prix an la tlan zui leh dawn nghe nghe!
McLaren driver pahnihte hnunga lawmman semna dawhsan hniam ber luahtu chu Ferrari driver Charles Leclerc niin, a team-mate Lewis Hamilton chu palina.
Pangana chu Mercedes driver George Russell niin, Red Bull driver ropui Max Verstappen chu lap khatna lekah Mercedes driver Kimi Antonelli nen chesualin race an tawpsan dun a, point 61 ngawtin Dutch dirver hi championship hmahruaitu lakah a hnufual ta!
Red Bull home Austrian Grand Prix-ah meuh pawh kumina chefuh tak tak thei lo four-times world champion Verstappen a talbuai leh a, record siama vawi nga a chak tawhna circuit-ah Italian rookie Antonelli vanga opening lap Turn Three collision tuar zo loin safety car tlanluh hnuah race a chhunzawm thei tawh lo.
Championship table-a pathumna la luah zui hram hram Verstappen chuan Antonelli kut a tawrh hnuah team radio kaltlangin, “Ka tawp fel ta, atthlak taka tukzal ka ni,” a ti!
An home race-a McLaren driver pahnihinbeihnaah Norris dingchang
