An inkar siam that zual nan Chinese FM-in North Korea tlawh

An inkar siam that zual nan Chinese FM-in North Korea tlawh
Beijing chu North Korea nena inlaichinna siam tha lehzual tura thawhpui turin a inpeih reng tih Chinese Foreign Minister Wang Yi chuan Pyongyang a tlawhnaah a North Korean thian hnenah a sawi niin Chinese foreign ministry chuan a sawi.
Beijing hian Pyongyang hi a lama pawh beh leh tumin hma a la mek a, an inzawmna a tlem hnuah hripui lengin a titha lo lehzual a, hetih lai hian North Korean President Kim Jong Un-a’n Moscow nena an inlaichinna a tichak thar ve bawk.
China chuan ram pahnihte inzawmna siam thatna kawnga hmalakna tihchak zel turin a inpeih niin Wang-a hian North Korean Foreign Minister Choe Son Hui-a nen an inkawmnaah a sawi niin ministry chuan a tar lang.
Foreign minister a nih chhunga Wang-a’n North Korea a tlawh hnuhnun ber chu kum 2019 tawp lam kha a ni a, kumin kum tir lam khan ram pahnih hruaitu lu berte chu an intlawh tawn leh bawk a. Chinese foreign ministry thupuangtu chuan Ningani leh Zirtawpnia minister zin hi inlaichinna tihhmasawn nana hmalakna pawimawh niin a sawi.
Ram pahnihte hian ‘an inrin tawna an inthlawp renga, an chhevel leh khawvel remna leh muanna vawng nung tur leh hmasawnna kawnga inpui tawn turin theihtawp chhuahin hma an la’ niin Wang-a chuan a sawi a. Inbiakpawhna, thawhhona leh mi pawimawh intlawh tawn tam a ngai tih a sawi bawk.
“China leh North Korea inkara inthian thatna rei tawh tak, thisen chhuaka siam chu a bo ngai lo vang a, chhe thei lo a ni,” a ti.
Chinese foreign minister-in Pyongyang a tlawh hi thla leha President Xi Jinping-a leh US President Donald Trump-a an inhmuh beisei a nih hma lawk a ni.
Trump-a pawh hian North Korean hruaitu nena hmaichhana inbiak a duh thu a sawi fo tawh a, a tak erawh a la thleng thei lo.
China leh North Korea inkara inpawhna hi nikum atang khan a tha thar hle a, September thla khan Kim-a hian Russian President Vladimir Putin-a leh hruaitu dangte nen China khawpuiah military parade an chhim a, relin Beijing a pan nghe nghe a, Xi-a nen pawh an inkawm.
October thla khan Chinese No. 2, Premier Li Qiang-a’n Pyongyang a tlawh leh.
Wang-a chuan Ningani khan Xi-Kim inbiak chu ‘chhinchhiahtlak’ tiin a sawi a, ‘ram pahnih inlaichinna hmasawnna a thlen a… a pawimawh hle’ tih a sawi.
China-in North Korea-a thil a thawn chhuah chu kum ruk chhungin nikum kha a tam ber niin $ tluklehdingawn 2.3 man a tling.
Beijing leh Pyongyang inkara mihring phur rel tlan thin chu kum 2020-a tihtawp a nih hnuah March thla khan chhunzawm leh a ni a, Chinese airline, Air China pawhin khawpui pahnih inkara thlawhna a thlawhtir leh bawk.