Pathianni zanah an mikhual Rayo Vallecano laka goal thun zo loin Real Madrid chuan 0-0 result hmangin Santiago Bernabeu-ah point khat bak an hlawhchhuak zo lo a, La Liga table-a an hmahruaina neikir zo loin a lo berah pahnihna ni chungin kartawp an nghah thlen a ngai dawn.
Los Blancos lunghnurna belhchhah turin an goal thun khawl thar Jude Bellingham chuan first half-ah a dar a sawh na a, a na lai tuam chungin khelh chhunzawm thei bawk mah se England midfielder hian a intihnat hma a pha lo niin a lang a, a goal thun zawh loh rualin an team-in goal lawm tur an nei lo chu a ni chhunzawm nghal mai a!
Inrinni khan Girona chuan Osasuna muala 4-2- hnehna changin table-ah Real Madrid an lehpel a, Pathianni zanah chak se Carlo Ancelotti team hian an hum ngai luahkir leh thei tur an nih laiin an hun tha neih an bawhpelh a, point hnihin Girona an pha ta lo.
Federico Valverde, Joselu, Jude Bellingham leh Vinicius Junior-te’n mualneitu team tan goal khungna hun remchang hmu vek mah se an hlawh-chham tlang dial a; kum 2000 hnu lama a vawikhatna atan Valle-cano chuan Bernabeu atangin point an hawn thei ta a ni.
Francisco enkawl Vallecano team hi chetha tluang lai ni ve reng rengin, inelna hrang hranga an match khelh hnuhnung vawikuaah tlawm an pumpelh fai vek a; Inrinni zanah pawh khan an Madrid thenawm team goal khung tur an chhaihbuai hle a, mahse, goal khung tur zawng chuan an khawsa nep hle a, hun pumin goal zawnah vawikhat pawh ball an thawnlut zo lo!
Chutih laiin home team khan goal an zawnna lamah goal attempt tum 22 ngawt neiin an hlawmchham vek a; an buaina belhchhah turin tunhnai Clasico-a an two-goal hero Bellingham chu first half-ah a dar na buaipui ngaiin a awm a, khelh chhunzawm thei bawk mah se team tan damna a thlen zo ta lo – tuntum chu!
Inkhelh banah manager Ancelotti chuan hlauhthawn tur lian awmin lang lo mah se Thawhtanni lama England international hliam dinhmun an enfiah tur thu a sawi a, nimin lama endik result erawh tarlan hman a ni lo.
An kawtkaiah Real chak zo lo
