An mualah Arsenal an chak

December 3, Nilai zan khan English Premier League 2025-26 khelh chhunzawm a ni a, hmahruaitu Arsenal chuan an mualah hnehna changin Manchester City nen an inkar an tizau. Arsenal rual hian Aston Villa pawhin hnehna an chang a, pathumnaah an inhlangkai ve bawk.
Arsenal manager Mikel Arteta chuan Chelsea laka chak zo lo squad atangin Brentford hmachhawn tur squad a tidanglam hret a, player thenkhat a thlak kual. Eberechi Eze aiah captain Martin Odegaard a luhtir a, midfield-ah Rice leh Zubimendi te nen inkawptirin mual laiah an that dan ang berin an inlan thei tawh. Tlarhma lakah Bukayo Saka aiin Nono Madueke a luhtir hmasa bawk. Tlar hnung lamah Jurrien Timber awltirin Ben White a luhtir a, a ti fuh hle a, Ben White hi ‘Player of the match’ a ni hial nghe nghe a ni. Timber hian bul tan lo mah se chawlhlawk hmain Mosquera a thlak a, mualchhung a lut tho thung. Gunners hi an defender tha pahnih; Gabriel leh William Saliba te tel lovin an inlan leh a ngai a, Mosquera a inhliam leh bawk nen an dam Gabriel leh Saliba te dam hun an nghakhlel hle.
Arsenal hian an mualah chak ngei tumin tan an khawh a, na taka an mikhualte nawrin goal pawh an thun thuai. Fuh taka ball an inpek kual hnuin Ben White cross tha tak chu ball tauh thiam Mikel Merino chuan fuh zetin minute 11-naah a tauh goal a, hmahruaina goal a thun.
Hma takah goal an thun vangin Aesenal an phur a, inrintawkna sang zawk nen an inlanzui theih phah. Gunners hian goal thun belh ngei tumin an mikhualte nawr thin mah se an hlawhtling thei lawk tawh lo. Brentford pawhin an si phurh sut an tum viau a, goal thun theihna hun tha pawh a nei. Brentford hian Corner atangin goal an thun teuh viau a, EPL-ah a zawna Golden Glove dawng thei David Raya chuan pui zetin a dansak hlauh thung a, a team a chhanhim. Gunners tan hian defender Ricardo Calafiori a hlauhawm thei viau a, forward ang maia khingpuite nawr na Calafiori hian goal hnih a thun teuh hle.
Inkhel hmuhnawm takah goal lut a awm belh theih loh reng hnuin bench atanga lut Bukayo Saka chuan hun pek belhah goal thunin Arsenal chakna a nemnghet. Saka hian Mikel Merino hnen atanga ball a dawn tha tak chu inringtawk takin box chhungah a la kual a, vanneihthlak ang reng taka pet goal in Gunners goal hnihna a thun. Saka goal thun hnu hian goal dang a luh belh thei tawh lova, an mualah 2-0 a hnehna changin Arsenal in point thum an hmuh belh.
An muala chak Arsenal hian khelh 14 atangin point 33 an hmu tling chiah a, City nen an inkar chu point ngain an tihzau belh leh. City hian thawhleh zan khan hnehna changin Arsenal nen point hnih chauhin an inthlau hman a, Arsenal lakah pressure tam belh mah se an mualah hnehna changin Gunners hi point ngain an kal fal zui leh ta a ni. Arsenal in table chung ber an luah zui zel laiin Brentford hian khelh 14 atanga point 19 hmuin 13-na an luah ve thung.
Arsenal hian inrinni zanah khingpui hautak an neihzui leh a ngai dawn a, pathumnaa inhlangkai thar Aston Villa hmachhawn turin Villa Park-ah an lenglut dawn. Villa Park-a Aston Villa hmachhawn hi thil awlai leh chakawm tak a ni dawn hauh lo. Brentford pawhin Inrinni zanah vek London club lian Tottenham an hmachhawn zui ve leh dawn bawk.
Pathumnaah Villa
Inrinni zanah Arsenal laka fiahna hautak hmachhawn tur Aston Villa chuan nilai zan khan American Express Community Stadium-ah Brighton an hmachhawn a, 4-3 a hnehna chang hramin, harsa takin point thum an hmu. Harsa taka point thum an hmuh hmang hian Chelsea an lehpel a, pathumnaah an inhlangkai thung..
Villa hian mikhual an nihna hmunah bul an tan tha lo viau a, si hnih ngawtin an hnfual hman. An muala bul tan tha Brighton tan Jan Paul van Hecke chuan minute 9-na lekah hmahruaina goal a thun nghal. Hma taka goal an thun hnuin an vannei zui leh a, Villa defender Pau Torres chuan minute 29-naah an lamah a ti-goal a, Brighton goal hnihna a thunsak. An mualah si hnih ngawt hma an hruai vangin Brighton an phur a, point thum hmu ngei turah an inngai hman hial awm e.
Goal hnih chhuah zawn mah se Aston Villa in na takin an khingpuite an nawr let a, goal li ngawt thun zawnin hma an hruai let. Villa tan hian Ollie Watkins chuan minute 37-naah goal thunin an si phurh a sut then a. Watkins vek hian minute 45’+7-naah an goal hnihna a thun zui leh zat a, an si phurh sut a sut zo ta chiah a, 2-2 a inhnehtawk chungin chawlhlawk an hmang.
Chawlhlawk hnu lamah Villa an khel tha chhunzawm a, Amadou Onana chuan minute 60-naah hma an hruai letna goal a thun a. Onana goal thun hnu hian Donyell Malen chuan minute 78-naah an goal lina a thun zui leh a, an hmahruaina a tizau. Si hnih ngawta an hnufual hnuin Brighton tan goal hmahruai thuntu Jan Paul van Hecke chuan minute 83-naah an si phurh sut then mah se an team tlawm tur a chhanhim zo tawh lova, Villa lakah uiawm takin an tlawm zui ta a ni.
Brighton lakah harsa taka chak Aston Villa hian khelh 14 atangin point 27 an hmu a. Inkhel dangah an chunga awm Chelsea an lo tlawm bawk nen pathumnaah an inhlangkai ta hial a ni. Inrinni zana an mikhual tur Arsenal an hneh thei ngat a nih chuan champion theih beiseina sang zawk an nei thar ngei ang. Brighton hian point 22 hmuin parukna an luah mek thung.