An mualah Manchester City an mualpho

International break a zawh hnuin inrinni zan khan English Premier League 2024-25 khelh chhunzawm a ni a, champion lai Manchester City chu an mikhual Tottenham Hotspurs lakah si li fai ngawta tlawmin an mualpho. City hi an khelh hnuhnung vawi ngaah an tlawm zawn hial a, hun duhawm lo tak an tawng mek.
Champion lai Manchester City hi inelna hrang hrangah vawi li lai an tlawm zawn tawh a, mak tak maiin an chak thiam thin an theihnghilh teh tlat. Inrinni zana an mikhual Tottenham lakah chakin, insiamthat tum viau mah se an mualpho zakhua tisei turin an mualah ngei an tlawm chiang hle. Spurs lakah an tlawm leh tak vangin City hian khelh khata khel tam zawk chungin Liverpool chu point nga ngwtin an thlau der tawh.
10-naa awm mek Tottenham hi Etihad Stadium-ah an ngampa hle a, goal pawh an thun hma hle. Inkhel tan atanga minute 13-na lekah James Maddison chuan Kulusevski siamsak tha tak chu hnaite atangin a pet goal a, hmahruaina goal a thun. Hma takah goal an thun vangin Spurs an phur viau a, goal an thun belh leh thuai bawk. City tan Phil Foden-a’n uiawm taka a thelh hnuin Tottenham hian fuh zetin an khingpuite an nawr let a, mawi taka ball a inpek hnuin goal hmahruai thuntu James Maddison chuan minute 20-naah an goal hnihna a thun a, an hmahruaina a tizau.
Si hnih an phurh hnuin City in an si phurh sut ngei tumin tan an khawh a, na taka an mikhualte nawrin goal pawh an thun teuh hle. EPL season kal meka goal thun hnem ber ni mek Haaland chuan uiawm takin hun tha a hlah a, chawlhlawk hmain an si phurh a sut thei lo va, si hnih faia hnufual chungin chawlhlawk an hmang.
Chawlhlawk hnu lamah insiamthat tum viau mah se City an insiamtha thei chuang lova, goal hnih an chhuah belh leh. City nawrna tak atanga talchhuakin Tottenham hian City an nawr let a, an khingpui tlarhnung an thiah fel hnuin Pedro Porro chuan Solanke siamsak tha tak chu goal-ah a chantir a, minute 52-naah an goal thumna a thun. An mikhual lakah goal thum ngawt an chhuah zawn vangin City dinhmun a chhe tak zet tawh a. Chak mamawh tak chunga si thum phur an nih miau vangin chak let duhna an nei lian hle. An mikhualte nawr betin, an si phurh sut zawh theihna hun tha nei hial mah se si nghak Vicario an paltlang thei hlawl lova an hun tha an hloh tlut tlut.
City in an hun tha neih an hlah zel laiin hun tawp dawn hnaiah Tottenham an che fuh nawn leh a, goal an thun belh leh. Hun pek belh tawp dawn minute 90+3-ah Brennan Johnson chuan Timo Werner siamsak tha tak chu awlsam takin a pet goal a, an chakna a nemnghet. Johnson goal thun hnu hian goal dang a luh belh thei tawh lova, Tottenham huan City mualah ngei si li fai ngawta hnehna changin poiont thum hlu tak an hmu.
City lakah an chak vangin Tottenham hian khelh 12 atangin point 19 an hmu a, paruknaah daih an inhlangkai dawrh. Tottenham in hma an sawn laiin City in hma lam an pan thei lova, pahnihna an luah chhunzawm. Pahnihna luah chhunzawm bawk mah se an hnuaia awm Chelsea, Arsenal leh Brighton te aia an san zawkna chu point khat lek a ni.
Season tharah player nei tha Manchester City in bul tan tha mah se an talbuai ta tlat a, inelna hrang hrangah a zawnin vawi nga an tlawm zawn der tawh. Kum 2006 hnu lamah khelhna chhung an tlawm zawn leh hmasak ber a ni a, Manager ropui Pep Guardiola hnuaiah EPL-a vawi thum an tlawm zawn hmasak ber a ni a. Guardiola hian a club enkawl tawhte inelna hrang hranga vawi nga a tlawm zawnpui vawi khatna a ni tel bawk. City hian kum 2003 khan an mikhual Arsenal chu 5-1 in an hneh lova, hemi hnuah an muala an tlawm chian ber tum chu 4-0 ngawta Tottenham an hneh lo hi a ni. City manager Pep Guardiola chuan kum hnih cham belh turin contract a ziak thar a, contract thar ziah hnu lawkah an mualpho ta hrep thung.