An ram muan nan Zelensky-a’n president nihna hlan phal

An ram muan nan Zelensky-a’n president nihna hlan phal
Volodymyr Zelensky-a chuan Russia-in Ukraine a rûn kum thumna a thlen dawn mek laiin an ramah muanna a awm theihna a nih dawn phawt chuan president a nihna chu ‘kalsan’ a phal thu a sawi.
“He thutthleng hi thawhsan a ngai a nih pawhin ka inpeih a. Ukraine-in Nato membership a neih theihna atan pawh ka kalsan thei,” tiin Ukrainian president hian thuthar lakhawmtute a kawmnaah a sawi.
Hetianga a sawi hma lawk hian US President Donald Trump-a chuan Zelensky-a hi ‘inthlan lohva roreltu (dictator)’ tiin kar hmasa tir lam khan a lo sawi tawh.
“He thil hi ka haw hran lo va; mahse, dictator chu ka ni lo,” tiin Pathianni khan May, 2019-a mipui thlan, Zelensky-a chuan a sawi a ni.
Zelensky-a chuan tunah chuan Ukraine himna chauh a ngaihtuah thu leh president nih reng chu a rilrua awm a nih loh thu a sawi.
Ukraine-ah hian Russia-in February, 2022 atanga a rûn avangin martial law an hmang mek a, hetih chhung hian an ram danah inthlan huaihawt theih a ni lo.
EU leh ram dang hruaitute chuan Thawhtanni khan Kyiv an pan khawm a, Ukraine an thlawpzia leh an himna tur an sawipui.
Spanish Prime Minister Pedro Sanchez, European Council President Antonio Costa leh European Commission President Ursula von der Leyen te chu he thutkhawma tel zingah an tel.
Zelensky-a chuan Ukraine-in Nato a zawm ve chu an thutkhawma an ‘sawiho tur zingah’ a tel tih a sawi a, eng ang thutlukna nge an siam dawn tih erawh a hre bik lo tih a sawi a. An thutkhawm chu ‘thil danglam tanna tur’ a nih a beisei tih erawh a sawi thung.
Trump-a chungchang an zawhnaah Zelensky-a chuan Ukraine thawhpui a nih ang leh Kyiv leh Moscow inkara palai a nih angin US president hi hmaichhana hmuh a duh tih a sawi.
“Palai a nihna bak hi duh ka nei a, hei hi chu a tawk lo,” tiin thuthar lakhawmtute hnenah a sawi a. Europe-a politics hruaitute chuan Kyiv hi indona tihtawpna turah hmaih bik a ni ang tih an hlauh lai mek a ni.
Zelensky-a hian Trump-a sorkarin Ukrainian leilung hausakna chungchanga a nawr pawh sawi langin, “Ruahmanna siam mek zel a ni,” a ti a. Ukrainian leh US thuneitute an indawr reng tih a sawi.
“Pek ve kan phal sa reng,” tiin Ukrainian hruaitu hian a sawi a; mahse, Washington hian Russian President Vladimir Putin-a chu ‘indo titawp nghal turin’ a hmin a ngai hmasa tih a sawi.
Zelensky-a’n thuthar lakhawmtute a kawm hma lawk hian Russia chuan indona kal meka drone hmanga Ukraine a beih nasat ber tum a tlingtla chiah.
Inrinni zan khan Ukraine-a Air Force Command thupuangtu, Yuriy Ignat chuan vawi khatah Russian drone 267-a beih an tawk niin a sawi.
Region 13 an bitum a, tam tak chu an lo kap thla a, hengte hi chuan thil pawimawh a tichhe lem lo vam mi pathum thi erawh an awm niin emergency services chuan a puang.
Ukraine-a Air Force chuan drone 138 chu an kap thla a, decoy drone 119 pawh an tum ang ti thei lovin an awm bawk a, an jam nia ngaih a ni.
Kyiv-ah chuan beihna an tawh avang hian darkar ruk chhung air alert tihchhuah a ni.
Zelensky-a chuan kar liam ta chhung khan drone 1,150, bomb 1,400 leh missile 35 hmangin Russia-in a bei niin a sawi.
Ukraine-a emergency services-in Inrinni zana beihna tha taka an lo chhan theih avangin lawm thu a hrilh a, Europe leh US chu ‘muanna tluantling’ a awm theih nana che turin a ti bawk.
Ukraine indona hian Thawhtanni khan kum thum a pumhlum chiah.
Ukraine, European tangrual leh US chuan buaina tihtawp tumin a hrang theuhvin hma an la mek.
US leh Russia chu kar hmasa khan Saudi Arabia-ah an inbia a, hetah hian Ukraine bakah Europe an tel lo va, European hruaitute hian Paris-ah intawhkhawm an ko ve bawk.
Zelensky chuan US-Russia inbiaknaa Ukraine a tel lo chu a sawisel a, Trump-a pawh Moscow dawt sawi boruaka chengah puhin Trump-a hian a chhan letnaah Ukrainian president hi ‘dictator’ tiin a sawi.
French President Emmanuel Macron-a chu Thawhtanniah khan Washington a thleng a, UK Prime Minister Sir Keir Starmer-a’n Ninganiah a tlawh ve thung ang.
Sir Keir-a hian Zelensky a tan thu leh Trump-a a biaknaah pawh Ukraine ram hran nihna zahsak a tul thu a sawi dawn tih a sawi.