Têbawihi Pautu,
Zemabâwk, Kâwn Vêng
Kan veng LC inthlan zawh hnu khan kan thlan thar member zinga chhungkaw pakhat chuan ka vaimim zawrh min dawr a. Awm thar chan kan la chang bawk nen anni pawhin min hre lo va; kei pawhin ka hre lem lo. An nu chuan, “Inthlan ni khan i duty ve tiraw?” min ti a. Ka duty ve thu ka sawi chuan heti hian a sawi ta a. “Lo thu teh, a mak asin. Inthlan ni khan kuhva eng ilo khilai beisei an awm takin tiin pawisa tlem kan pa ka paitir ve a. Mahse, zu in mi takngial pawhin eng mah beisei an nei lo va, mipui lam khan a riltamte hlauin thingpuite leh ei tur chi hrang hrang an lo lei zawk a. An lo duat em em a. Amahah beisei an nei miah lo nia. A in-candidate-pui mi dangte pawh chu ti tho chuan an lo ti a. Pawisa hmanna tur an hre lo reng reng. An lo hrai puar nileng thak thung,” tih thu chu thil thleng ngai lo a nih avangin a mak ti chuan min lo hrilh bawrh bawrh a. A mak lo ve, kalphung thar zia, Zoram mipuiin kan beisei chu a intan chiah zawk a ni.
Ram hruai tawhtute’n ram an hruaina hmasaah chuan naupangin party hming an sawi takngial pawh hi zahpuiawm a ni a. Hmeichhia pawh mi pangngai chu tawmim tur leh party-a ring rawlh eih lo tura beisei kan ni. Party lam hawi thil sawi pawh hmeichhia te te tan chuan zahthlak deuh mai a nia! Inrawlh chin chu miin hmuh dan tâwk an siam zêl.
Miin dawt hmanga thu a sawi thiama, mi a hneh theih viau chuan ‘a politician hle mai’ tih a ni. Politician kan hmuh dan pawh chhuanawm loh tak chu a ni.
Ram hi Lalpa ta ni si, ringlo mite kuta a awm ang maiin ram inkaihhruai dan erawh mipui nawlpui tel leh sawi ve zahthlak khawpin a awm thung a.
Vote thlak ni thlengin mipui nawlpui kal ngaihna hre lo tam tak kan awm a. Hmelhriat tha neih ve loh chuan eng mah awmzia a awm lo tih hre mah se, khua leh tui nihna vânga vote thlak ve ngei a ngai ?hin si. Duh leh tha, rin pawh nei tawh lo mah se a tih tura a ngaih avangin phur lo taka vote thlak hi tam tak an awmin ka ring. Sawi ringawt pawh kan sawi ve ngam loh. Kan sawi ve atan pawha mawi lo. Hmasawnna min thlentu ni bawk si lote vote tura mahni hna tûl kalsan chu tu nge phur reng ang ni?
Tunah chuan kal ngaihna hre lovin kalphung thar, mipui sawrkar, hmelhriat ?ha neih kher ngaih ve lohna chu kan bawh lo thei lo va. A thau sawk pha hlawih hlawih chin leh a thau sawk phate thu hnuaia kûn tlata inngai te, beidawn tawh avanga kalphung hluiin therhlo beiseia a hruai ât tawhte tih chauh lo chuan kalphung thar, mipui zalenna chu an bêl ta ruih ruih mai.
Kalphung tharin a hrin chhuah pakhat leh chu, hmeichhe tan politics sawi a zahthlak loh tan ringawt pawh hian thianghlimna a entir, mahni vote hralh pawizia kan hre thar a. Street champaign te hi en kual mah teh u, ram hi Lalpa ta a nih angin mipui nawlpui tel ve pawh a zahthlak miah loh nia. Pathian faka lam suau suauna hmunah a chang zo ta! A va ropui êm!