Andra Pradesh-ah Chandrababu Naidu

“Never write off a politician” tia sawi thin a ni a, chu chu Andra Pradesh inthlanah zirlai turu tak zirchhuahin a awm.
Thla riat kalta kha chuan Chandrababu Naidu chu lung inah tangin kum 74-a upa ni tawh bawk si, a party Telugu Desam Party (TDP) chu zuihral mai tura ngaihna a awm.
Case hrang hrang avangin ni 52 vel zet lung inah hun a hmang a, chu chu inthlan dawn hnaih tawhah chuan politician tan chuan hun rei tak a ni.
Khath lai khan ruling YSR Congress party leh Chief Minister Jagan Mohan Reddy te chu an welfare scheme kalpui that bawk si avangin hneh theih loh tlukin an lang a.
Naidu leh a fapa Lokesh leh a nupui Bhuvaneshwar tena TDP tana sympathy vote an dilna pawh chuan thlawpna liantham emaw hnawlna emaw lantir hmel a hmu chuang lo.
Kum 2024 inthlanah chak lo leh se chuan Chandrababu Naidu tan chuan kum 50 tling tawh a political career chu a tawp zuina tur a ni ang. Mahse, politician fing tia hriat lar niin BJP te nen thawkho in hnehna an chang leh tlat.
Thil inthlak danglamna vek nia sawi chu action hero Pawan Kalyan an Rajahmundry Central Jail a Chandrababu Naidu a hmuh hnua a party Jana Sena te chuan Chandrababu Naidu nena thawk dunin Jagan Mohan Reddy a YSRCP chu an paihthla dawn tia a puan kha a ni. A fans tena ‘power star’ tia an sawi chuan TDP leader chu lifeline a pe leh tihna a ni bawk.
Duh se Palwan Kalyan chuan nghak helkin TDP te an zuai raih zual thlengin a dawh thei a, BJP ten an thlawp thei tih a hre reng bawk. Mahse, Pawan Kalyan chuan Naidu chu Delhi a BJP leader ten Prime Minister Narendra Modi a sawisel nat thin em avangin an ngaina lo tih pawh a hria.
Kum 2002 khan post-Godhra riot thlen hnuah Naidu chuan Modi chu Gujarat chief minister atanga bang turin a lo nawr tawh a. Chu mai bakah kum 2018 khan Andra Pradesh special cateogory status pek duh loh avangin Naidu chuan NDA a lo chhuahsan phah tawh a ni.
Pawan Kalyan hmalakna avang liau liauin Chandrababu Naidu chuan NDA ah hmun nei leh theiin Narendra Modi leh Amit Shah te ke pen rualin a pen leh theih phah a, chumi tur chuan seat loh theih lohin an sacrifice tiin a sawi bawk.
Alliance din a nih hnuah Chandrababu Naidu chuan party pahnihah vote transfer a ngai tih hriain chu chu BJP te Andra Pradesh a vote share one percent chauh nei tena an mamawh ngawih ngawih a ni bawk.
Naidu leh Pawan Kalyan te chuan nasa taka hma lain kar tin inah meeting an nei zur zut a, dawhsan intawm tawnin an inzahder bawk a, chu chuan danglamna a siam chak hle.
PM Modi leh BJP leader te pawhin TDP-Jana Sena narrative chu thlawpin development an aupui bawk a. Naidu chuan a manifesto siamah YSRCP te welfare programme kalpui chhunzawm zel te tiamin hna tau tet siam te a tiam bawk a.
World Bicycle Day te khan Chandrababu Naidu chuan mipuite chu bicycle lei tura ngenin exercise nana tha ber a ti a, Andra Pradesh mipui ten an lei phah nasa hle.
Naidu hian Congress atanga politics bul tanin Emergency lai 1975-77 khan Sanjay Gandhi a thlawp a, kum 28 lek niin MLA a ni a, kum 1980 khan T Anjaiah kaihhruai Congress cabinet member a ni bawk.
Naidu chuan NT Rama Rao fanu Bhuvaneswari nupuiah neiin Telugu Desam Party ah a lut a, August 1984 a a puzawnin Nadendla Bhaskar Rao a hneh theih nana a chetlakna chuan a puzawn rin a hlawh phah hle a. A hnu kum sawm pakhatah Naidu chuan a puzawn chu paihthla in party-ah thuneihna a chang zui ta a ni.
Kum 45 mi lek niin Chief Minister niin kum 2004 thleng khan term hnih a chelh a. Khatyihlai khan Brand Naidu kalpuiin economic reformer politician angin a lar. Brand Hyderabad chu world IT map ah a chuan tir vang thei a, CEO of Andra Pradesh tih tea koh fiam a ni bawk.
National politics lamah HD Dece GOwda leh IK Gupral te prime minister lai khan United Front convener a ni a. Kum 1999 khan TDP chu NDA a party lian ber niin MP 29 a nei.
Andra Pradesh chu then hran niin capital Hyderabad pawh a chang lo zawkah a tang a. Kum 2014 inthlanah khan BJP leh Pawan Kalyan te thawhpuiah a sawm leh a.
Kum 2018 khan BJP te nen inthen lehin kum 2019 inthlanah an chak lo zui a, seat 23 chauh la in an party chetchhiat ber tum a thleng bawk.
Tunah harsatna tam tak karah thuneihna chang turin thlan tlin a ni leh ta a. United Front Convener a nih ang khan tunah pawh kingmaker ni leh thei a ni a, PM pawh ni thei khawpa dinhmun remchangah a awm thei tia sawi a ni.