Anfield-ah Liverpool an mualpho

Internation break a nih hnuin Inrinni zan khan English Premier League 2025-26 khelh chhunzwm a ni a, champion lai Liverpool chu Anfield-a an mikhual Nottingham Forrest lakah 3-0 ngawta tlawmin an mualpho. Liverpool rual hian team lian Manchester City pawh Newcastle United hneh lovin an tlawm ve bawk.
Reds an buai
Champion lai Liverpool hi EPL an khelh hnuhnung berah 3-0 ngawtin Manchester City an hneh lova, an elpui lian lakah an tlawm chiang hle. 3-0 ngawta an tlawm hnuin an mualah ngei insiamthat an tum hle. Insiamthat tum viau mah se an mikhual Nottingham Forrest lakah si thum fai bawkin an tlawm zui leh a, hmasawn lam pan thei lovin Reds an buai thui viau tawh.
Liverpool hian table hnuai lama awm Nottingham Forrest lakah bul an tan chhe hran lova, na taka an khingpuite nawrin goal pawh an thun teuh thei hle, Mac Allister-a’n uiawm taka a hun tha neih a hlah hnuin hun tha an nei zui leh a, uiawm takin an chhawr tangkai thei lo zui leh bawk. |um thum ngawt an hun tha neih an hlah zawn hnuin goal chhuah hmasa zawkah an tang ta daih. Mualneitu laka him hram hram Nottingham Forrest hian corner an hmu. Corner atanga ball kal zel atangin Murillo chuan hnaite atangin a pet goal a, minute 33-naah hmahruaina goal a thun. Hmahruaina goal an thun hnuin goal dang an thun belh zui leh thuai a, an goal hnihna erawh pawmsak an ni lo thung a, 1-0 a hmahruai chungin chawlhlawk an hmang.
Chawlhlawk hnu lamah Nottingham Forrest an khel tha chhunzawm a, goal an thun belh leh thuai. Second half tan atanga minute khatna lekah fuh leh chiang zetin Liverpool tlarhnung an thiat a. Nicolò Savona chuan awlsam taka pet goal in an goal hnihna a thun a, an hmahruaina a tizau.
An mualah ngei goal hnih an chhuah zawn hnuin Liverpool in goal thu ngei tumin tan an khawh. Na taka an khingpuite nawrin hlauhawm siam thin mah se a tawp an khar fuh thei lo. Reds manager Arne Slot chuan British player manto ber Alexander Isak chhawr bawk mah se Isak hian tangkaina a la nei tam thei chuang lo va, a hlauhawm tak tak thei chuang lo. Goal thun an tum luatah an chesual a, goal an chhuah belh leh ta zawk. Si hniha hmahruai tawh Nottingham Forrest hian fuh zetin an khingpuite an nawr let a, Morgan Gibbs-White chuan minute 78-naah an goal thumna thunin an chakna a nem nghet. An si phurh sut tum viau mah se Liverpool in hun tawp thlengin goal an thun thei lova, an mikhual Nottingham Forrest lakah si thum fai ngawta tlawmin an mualpho zui ta a ni.
Champion lai Liverpool hi season kal mekah an che chhe chho hle. Vawi 12 khel tawhin vawi ruk an chang a, vawi ruk dang tlawm zawkah an tang tawh. An khelh hnuhnung pahnihah goal ruk lai an chhuah a, goal thun an nei lo. Khelh 12 atanga vawi ruk ngawt tlawm hi team lian Liverpool tan chuan a tam tawh mah mah se, champion nawn leh a harsa hle dawn niin a lang. Reds hian khelh 12 atangin point 18 chauh an hmu a, 11-naah an awm mek. An talbuai thui viau hmain insiamthat an mamawh hle.
3-0 ngawta Liverpool sawp thei Nottingham Forrest hian khelh 12 atangin point 12 an hmu a, 15-naah an awm ve thung.
City pawh an tlawm
Inrinni zana inkhel dangah team lian Manchester City pawh an tlawm a, mikhual an nihna St James Park-ah 2-1 in Newcastle United an hneh lo.
St James Park-ah Newcastle United leh City te an inhnehtawk viau a, goal pawh a lut har hle. Goal lut a awm theih loh reng hnuin Harvey Barnes chuan minute 63-naah hmahruaina goal a thun. City tan Ruben Dias-an minute 68-naah an si phurh sut bawk mah se goal hmahruai thuntu Barnes chuan minute 70-naah Newcastle hmahruai nawn lehna goal a thun a. Goal dang chhuah belh tawh lovin an mualah hnehna hlu tak an chang zui ta a ni. Magpies laka tlawm City hian pathumna an la luah chhunzawm thung.