Japanese anime ‘Demon Slayer: Kimetsu no Yaiba – the Movie Infinity Castle’ chuan tun weekend (Zirtawpni – Pathianni) kalta khan North America-ah cinema hall ticket hralhna atangin dollar maktaduai 70 la lutin, North American box office No.1 a ni.
He film hi opening weekend-ah US leh Canada-a cinema all 3,315-ah tihchhuah a ni a, opening day, Zirtawpni kalta khan cinema hall ticket hralhna atangin dollar maktaduai 33 la lut theiin, North American box office-a anime film zinga opening day-a sum la lut hnem ber record a siam a, kumina animated movie tlangzarh tawh zingah opening weekend a sum la lut tam ber a la ni a, September thlaa animated film tlangzarh tawh zawng opening weekend a sum la lut tam ber a la ni bawk.
‘Demon Slayer’ hi US pawnah pawh a chetha viau a, ram hrang hrang 49 atangin dollar maktaduai 62.1 a la lut bawk a, tihian tun weekend kalta a a lak luh zawng zawng chu dollar maktaduai 132.1 a ni he film hi US pawnah chuan an tlangzarhna a rei ve leh deuh tawh a, Japan-ah chuan July thla khan an tlangzarh tawh a, Japan-ah ringawt pawh dollar maktaduai 200 dawn a la lut thei a, tihian khawvel huapin dollar maktaduai 400 dawn a la lut der tawh a ni.
‘Demon Slayer: Kimetsu no Yaiba – the Movie Infinity Castle’ hi US-ah hian opening weekend-a dollar maktaduai 35-40 vel la lut thei turin an chhut a, mahse US-ah thalaite zingah anime genre a lar ta riau a, ticket leitu 57% pawh kum 18-34 an ni. Tuna an tihchhuah hi a film trilogy a part hmasa ber a ni a, Haruo Sotozaki direct a ni.
The Conjuring: Last Rites-in dollar maktaduai 26.1 la lut lehin No.2 a la ni a, he film hian US-ah kar hnih chhungin dollar maktaduai 131.1 la lut tling tawhin, US pawna a lak luh nen chuan maktaduai 332.9 a tlin tawh.
‘Downton Abbey: The Grand Finale-in dollar maktaduai 18.1 la lutin, No.3 a ni a, he film hian US pawn, ram dang 31 atangin dollar maktaduai 12.3 la lut bawkin, tihian opening weekend-a a lak luh chu dollar maktaduai 30.4 a ni. He film hi hmeiche kum 50 chunglamin an lawm lehzual a, ticket leitu 72% chu hmeichhia niin, chung zingah 55% chu kum 55 chunglam an ni bawk.
Stephen King novel ‘The Long Walk’ behchhana film an siam chuan dollar maktaduai 11.5 la lutin No.4 a ni.
Pixar-in an animated film ‘Toy Story’ kum 30 tlinchampha lawm nana a film an tlangzarh tharleh cuan dollar maktaduai 3.5 la lutin No.5 a ni a, US pawna a lak luh nen chuan maktaduai 5.2 a tling.
Box office Top 10:
1 Demon Slayer -Kimetsu no Yaiba- The Movie: Infi… $70,000,000
2 The Conjuring: Last Rites $26,100,000
3 Downton Abbey: The Grand Finale $18,100,000
4 The Long Walk $11,500,000
5 Toy Story $3,500,000
6 Weapons $2,725,000
7 Hamilton $2,200,000
8 Freakier Friday $2,100,000
9 Spinal Tap II: The End Continues $1,674,926
10 The Sound of Music $1,486,231
Anime ‘Demon Slayer Infinity Castle’-in record siamin box office-ah a No.1
