Antwerp-a in chhawng sang kangah mi pang thi

Antwerp khawpuia chhawng 10-a sang ina kangmei chhuakah mi panga an thi a, mi eng emaw zatin hliam an tuar bawk niin Belgian police-ten an sawi.
Nilaini chawhma dar 10:00 (India-a chawhnu dar 01:30) vela Linkeroever district-a in hi a kan hnuah a chhawng riatna atangin meikhu nasa tak a chhuak tih a hmuh theih.
Video darh pakhatah chuan mi pakhat chu balcony atangin in thenawm chiah tukverhah lawn luhin tlanchhuah a tum a che vel a lang.
Police-te chuan block-ah hian mi 200 chuang an cheng tih an sawi a, fire department chuan a chhunga flat 80-a mite chu an sawn chhuak tih an sawi.
Kangmei hi a chhawng hnuai berah eng emaw fel lo awm avanga chhuak niin an sawi.
Police thupuangtu, Kim Bastiaens-i chuan Belgian sorkar TV hnenah, “Linkeroever-ah hian mi eng emaw zat an thi a ni,” a ti a. Mi tam tak hliam na leh tenau tuar an awm bawk tih a sawi.
Police-te chuan a tirah mi paruk an thi tih an sawi a; mahse, a hnuah mi pangaah an siam tha leh a, chawhnu lamah Antwerp fire service chuan an thelh mit thu an sawi bawk.
Belgian King Philippe-a chuan Linkeroever hi a tlawh zui a, residential care center-a sawn chhuah thenkhatte hmuin kangmei chhuahna hmun a tlawh bawk.
Kang thelhtute chuan flat tin lutin mihring tuar an awm em tih an en zel tih an sawi a, a chhungah hian meikhu chu a darh chak hle a, a awmte chhuahtir zung zung a harsat thu an sawi.
Antwerp fire brigade thupuangtu, Marie de Clercq-i chuan kangmei hmachhawn hi a khirh hle tih sawiin a chhunga hmuh chian theih loh leh meikhu chhah tak avangin thelh a harsa tih a sawi.
Prime Minister Bart De Wever-a chuan Linkeroever-a ‘kangmei rapthlak tak’ thlenga thite leh hmun hima sawn chhuahte a ngaihtuah tak zet tih a sawi a. Flemish parliament chuan Nilaini chawhnua inkhawm an tanah thite sun nan minute khat ngawi rengin an ding bawk.