Union Minister hlui leh Lok Sabha MP Anurag Thakur chuan Congress party leh ‘an thlahtute’ chu backward classes leh Dalits te reservation duhlotu tiin a sawi.
Caste kaihhnawiha a thusawi avanga Opposition tena Budget debate-a an beih vak hnuah Thakur chuan, “Ka thusawiin mi thenkhatte a khawih na hle a, Congress ecosytem chuan an la na zual a ni. Privileged bika an inngaih avangin anni chauh chu zawhna zawt theiah an indah a ni. Heng mite thlahtute hi alawm backward, Dalits te mawl tia sawitute chu ni,” tiin Anurag Thakur chuan a sawi a.
Thakur chuan Prime Minister hlui Rajiv Gandhi khan vantlang hriatah backward communities te chu ‘mawl’ a ti a ti bawk a.
“Rahul Gandhi leh Congress party te hian March 3, 1985 a Navbharat Times Lucknow edition a Alok Mehta byline interview ‘No promotion of intellectuals in the name of reservation’ tih kha chhiar rawh se. Shri Rajiv Gandhi khan reservation hmingin mi mawlte chawisan ka tum lo a ti a ni” tiin a sawi.
Thakur chuan Congress te chuan Rajiv Gandhi interview chu an dem dawn em a ti bawk a. “Prime Minister hlui fapa fing tak hian eng vangin nge a pa mitah he rama backward class te chu mawl an nih a hrilh dawn em? Congress te hian Rajiv Gandhi a casteist statement an dem dawn em? Kha statement duhlohna resolution pass a ni ang em?” tiin Anurag Thakur chuan a sawi bawk.
BJP leader chuan Jawaharlal Nehru pawh eng vangin nge Dalits leh Adivasi te hnenah reservation pek an nih loh zawh a nihin, ‘reservation chuan an rilruah inferiority complex a thlen ang a, chuvang in reservation pek an ni lo’ tiin a chhang a ni a ti bawk a. Chutiang bawkin Prime Minister Indira Gandhi pawh khan chu policy bawk chu a kengtlang zel a ti bawk.
“Mandal Commission report siamtu Bindeshwari Prasad Mandal khan a report kalpui a nih hmain a thihsan a, Indira Gandhi leh Rajiv Gandhi ten an kalpui duh hek lo. Rajiv Gandhi phei kha chuan langsar takin Mandal Commission report a dodal a. Kaka Kalelkar report a awm hnuah pawh Congress te chuan chu report chu an rap bet leh a ni. Congress party a feudals te khan Mandal report leh Kaka Kalelkar report kha dodal lo se chuan vawiin hian thil awm dan a danglam ngei ang” tiin Anurag Thakur chuan a sawi bawk.
Anurag Thakur-a’n Congress te sêl
