Apex Bank CD Ratio 69%
Sawrkar kum kalta chhung khan Apex Bank-in an hnena sum lut atanga anmahni dawrtute hnena loan hmanga a pek chhuah lehna, Credit-Deposit Ratio chu za zelah 69 a ni a. Bank CD Ratio tha leh hrisel tehnaah chuan za zela 60-80 inkara awmte an ni.
Mizoram Cooperative Apex Bank Ltd. Board of Directors chu Zirtawpni khan an thukhawm a. 2025- 2026 sawrkar kum chhunga bank sum chevel leh hmalakna thlirlet a ni. Hetih rual hian loan chi hrang hrang – biak in loan, Bana Kaih, society loan, mimal loan chi hrang hrang, a vaiin cheng nuai 2254 pek a remti.
Thutkhawmah hian Mizorama PACS (Primary Agricultural Credit Society) hrang hrang enzui leh enkawltu Committee din a ni a. Khawpui chhunga mipuiin bank pan kher loa nitin sum an khawl theihna tura pawisa lamtu – pigmy deposit collector dilna a pawmpui bawk.
Sawrkar kum liamta ni hnuhnung ber thlenga MCAB dinhmun chu – branch 35 leh ATM 45 a nei a, deposit cheng vaibelchhe 1930, loan vbch. 1272, a vaiin an sum chevel vbch. 3202, profit vbch. 40, CD Ratio 69% leh Net NPA 0.43% a ni.
‘Bank ngelnghet tak a nih theihna atana tha thawhtu staff-te leh ‘Mizo Bank’ ti a dawr tlattu Mizo mipui chungah lawmthu kan sawi a ni,’ an ti.
Apex Bank CD Ratio 69%
