Apuia’n thu awih zel a tum

2023-24 season-ah khan Mumbai City FC-ah a khel a, 2024-25-ah Mohan Bagan-ah a insawn. A insawn dawn hian a nu leh pa a rawn thlap.
Lalengmawia Ralte, Apuia tia koh a ni a, Mumbai City FC fan-te’n an ui em avangin a chungah hian an lawm lo, pawisa lema vawm te pawh an awm. Chutiang karah chuan theihtawp a chhuah a, a thlen chin chu football ngainate’n an hria ang.
Khatia a insawn dawn khan a nu leh pa a rawn a, mahse a nu leh pa hian a kutah an dah let. “Ka nu leh pa ka rawn a, mahse ka pain ‘Keini aiin i hre zawk alawm,’ min lo ti a,” Apuia chuan a ti.
“Ka kutah an dah a, ‘Keini aiin i hre zawk alawm. I agent te nen in sawi ang a, agent te paw’n an hre zawk ang. Pathian hnenah kan lo hlan ang a, ngun takin in lo ngaihtuah dawn a nia,’ pa pain a ti a,” tiin a sawi zawm a ni.
“Nu leh pa thu awih hi a tha a, awih zel ka la tum reng. Ka naupan lai aiin a hlutna hi tunah ka hre chiang zawk,” a ti bawk.
Football-ah sang tak a thleng a, amah hi chuan “Mi ai hian malsawmna hi ka dawng bik ni berin ka hria. Mi aia ka phu bikna a awm lo, mi tih loh ka tih bik a awm lo a, malsawmna ka dawng a ni,” tiin a sawi.
A thil tawnah thuawih thatzia a hmu a, “Thuawihna rah hi a lo awm chiang khawp mai. Ka phak ang tawkin thuawih hi ka tum,” a ti. “Pathian thu awih hi a tha a ni, hei hi a chiang lutuk. A thu awih mai hi a tha a ni tih ka chiang a ni,” a ti bawk.
Footballer lar ni chungin lehkha a la zir a, MA (Sociology) a zir mek. A nu leh pain lehkha hi zir zel turin an duh a, an thu awihin a zir ta zel a ni.
Pawl 10 a zir laiin India U-17 team-a trial theihna remchang a nei a, mahse a trial lo. A nuin ‘I zirlai hi a pawimawh em mai, pawl 10 hi pass phawt rawh,’ a tih vanga trial ta lo a ni. A trial ta lo kha tun thlengin a inchhir lo a, nu leh pa thu a lo awih kha a lawm. “Lo trial ta ila, nu leh pa thu ka awih lo tihna a ni dawn a, sang tak pawh thleng ila ka hlim ka ring chuang lo,” a ti. “Bible-in nu leh pa thu awih tur a ti,” tiin a phak ang tawka nu leh pa thu awih a tum chhan a sawi.