Assam Rifles Kohhran biak in ram, ZPM party office atana chhuhsak tuma hma la tu anga puhna chu thudik lo a ni tih MLA Lalmuanpuia Punte chuan a sawi a. Dawt a nih zia mipui hriata pholan a nih theih nan dan hnuaiah a tul anga umzui a tum tih a sawi.
Adviser to chief minister Lalmuanpuia Punte chuan Assam Rifles Kohhran ram chungchangah thu belhchian dawl lo hmangin Ramkinlova’n a puh a, amah chu ami hriatchian tak, tunhma deuh atanga amah be fo a, nikum lama ZPM sawrkar a rin thu sawia be nasa zual, MLA inthlanah pawh BJP leh JDU ticket-a lo ding ve tawh a ni tih a sawi.
“Min rawn biak fo takah chuan titi phunglengah Assam Rifles chhuak ta se, an mandir leh kohhran ram hi engtia awmzui tur nge, tiin ka zawt a, a ni chuan Synod ram a nih thu min hrilh a, kei pawhin a nih tak chu mawle, tiin ka chhang ve mai a. Chu bak chu hetiang lam hawi kan sawi lo hrim hrim. Biak in chungchang min rawn zawt sek, a tih hi chu thu dik lo a ni. Governor-in a be duh che ti anga a sawi hi, a biak ni nia a (Ramkinlova) sawi hi September 7 niin a sawi a. Hemi ni ah hian governor hi dam lohna avangin damdawi inah a lut a, governor nen kan awmdun lo. Kohhran upa in hetianga dawt a sawi mai hi mak ka ti a; Mizopa thukhawm anga mi kan be ngawt angin hetiangin governor-in mi an be ngai lo tih hi kan hre theuh awm e,” a ti.
He inpuhna hi tute emaw ruahmanna nia a hriat thu Lalmuanpuia Punte hian a sawi a. ZPM-in party office an la nei lo bawk nen, Assam Rifles chhuak mai tura ngaihah an biak in, party office-a neih tum anga puhna niin, party intihhming chhiat tumna a nih bakah a mimal politics zinkawng tihchhiat tumnaah a ngai tih a sawi a ni.