AR-in Mizoram leh Myanmar inkalpawhna kawng khar

Zokhawthar bula |iau lui kanna lei, Mizoram leh Myanmar inkalpawhna kawng pawimawh chu Assam Rifles te’n an khar a, mihring inkalpawh an khap.Zokhawthar atanga thu dawn danin, Zirtawpni tlai lam, zan tirah Assam Rifles hian kawng hi an khar a, inkalpawh an khap a, mahse a tukah bungraw inpek an phalsak a, mihring inkalpawh chu an khap zui.
Zokhawthar VC president Lalmuanpuia’n The Aizawl Post a hrilh danin, Zirtawpni khan Zokhawthar-a duty Assam Rifles te hotupa, Serchhip-a awm chu Zokhawthar-ah hian a kal a, lei hi khar a nih tur thu a sawi a, tlai lamah he thu hi a sawi a, an khar zui nghal a ni.
Assam Rifles hotupa hian Inrinni khan chawhma lam dar 11 velah VC te leh YMA hruaitute a ko a, lei hi khar zui a nih tur sawiin, mahse April ni 20 atanga ni 30 thlengin bungraw inpek chhawn an phal ang a, mihring inkalpawh chu an phal dawn lo tih a sawi a, chumi hnuah chuan bungraw inpek chhawn pawh an remti dawn lo tih a sawi a ni.
Myanmar lam atangin Zokhawthar-a sikul kal naupang engemaw zat an awm a, Assam Rifles te chuan sikul naupangte hian sikul an kal chhunzawm ang a, mahse ni tin kal lam leh haw lam an in-report ziah ang an ti.
Hetia lei an khar avangin nghawng hrang hrang a nei nghal a, Zokhawthar VC president chuan a lehlam lehlamah mihring an tang ang tih a rinawm thu a sawi. Zirtawpni-a lei an khar khan Zokhawthar mi thenkhat, lei kana Khawmawi (Myanmar) lama kalte chuan vote an thlak theih loh phah tih a sawi bawk.
An inkawmnaah Assam Rifles hotupa hian sorkar laipuia Ministry of Home Affairs thu anga lei hi khar an ni tih a sawi a, ruihhlo tawlh a nasa tih te, raltlante an kal kual nasa tih te an chhuanlam, VC president chuan a ti.
“Min nghawng nghal a, eichawp zawngte a nghawng nghal a, inhlawhna a tlem nghal bawk a. Tin, a lehlam lehlamah mihring tangkhang an awmin a rinawm bawk a,” Lalmuanpuia, Zokhawthar VC president chuan a ti a, “Sorkar laipui thu anga ti kan ni tiin an sawi a, ruihhlo leh refugee te hi chhuanlamah an hmang bawk na a, border fencing leh free movement regime tihtawp tumna a ni zawk ang em tih hi rilruah a awm,” a ti bawk.
Inrinni khan Zokhawthar VC te hian Champhai bawrhsap hnenah an dinhmun hi ziakin an thlen nghal a, bawrhsap hian Mizoram sorkar home department hnenah a thlen ve leh dawn a ni.